Ճոճկանի գյուղապետ Սամվել Գիգոլյանը «Հետքի» հետ զրույցի ժամանակ անդրադարձավ այն նախընտրական խոստումներին, որոնք տվել էր իր ընտրողներին 2008 թ.-ի հոկտեմբերին կայացած ՏԻՄ ընտրությունների ժամանակ: Գյուղապետն ասաց. «2008 թ.-ի հոկտեմբերին ընտրվել եմ, նոյեմբերի 21-ից աշխատում եմ Ճոճկանի գյուղապետ: Ես գյուղացիներին շատ բան չեմ խոստացել: Նախկին գյուղապետը աշնանացանի և գարնանացանի եռուն օրերին` տարիներ շարունակ, միայն հողի հարկը նախապես վճարելու պայմանով է գյուղացիներին թույլատրել մտնել իրեն սեփական վարելահողերը` վարուցանք անելու համար: Ես գյուղացիներին ասել եմ` Ձեզ չեմ խանգարելու, աշխատեք, ապրեք: Սա նշանակում է, որ ես գյուղացիներին չեմ ասելու` հողի հարկը բերեք տվեք, թողամ ձեր սեփական հողը վարեք, թողամ ցանեք: Ասել եմ` չեմ խանգարելու: Ասել եմ` բերքը ստանալուց հետո կբերեք համայնքի բյուջեի հարկերը կտաք, Ձեր եկամուտները ապահովելուց հետո»: Գյուղապետն ասաց, որ խոստացել էր, որ գյուղում ոռոգման ջուր կլինի, և այժմ ջուրը որոշ չափով կա: «Մեր բնակչության մեծամասնությունը ամռանը դաշտում է լինում: Մշակեցին հողը: Ով լավ աշխատեց, լավ վաստակեց, օգուտ ստացան, ովքեր էլ թույլ աշխատեցին օգուտներ չստացան: Նույն հողակտորները իրար կողքի մեկը ջրել էր, մյուսը` չէ: Ով ջրել էր, ընտիր բերք է ստացել, շուրջ 1 մլն դրամի եկամուտ է ստացել, ով վարելահողը չէր ջրել, ոչինչ էլ չի ստացել»,- ասաց Սամվել Գիգլոյանը: Նա նաև հայտնեց, որ այսօր գյուղի ներքին թաղամասը, որի մեջ մտնում են դպրոցը և մանկապարտեզը, ապահովել է ջրով, մի բան, որ ներառված չէր իր նախընտրական ծրագրում: Գյուղապետի խոստումների համաձայն` այս տարի վերագործարկվել է նաև գյուղի մանկապարտեզը: Նորաբաց մանկապարտեզի տնօրեն Սուրիկ Խուդինյանն էլ հավելեց, որ գյուղապետը կարգավորել է գյուղի սանիտարական վիճակը: «Ես պարոն Գիգոլյանի մասին ասեմ` շատ քիչ է խոստանում, շատ է անում, իսկ խոստացածը հաստատ է անում: Մենք շատ ուրախ ենք, որ այդպիսի գյուղապետ ունենք: Դա բնակչության մեծամասնության կարծիքը պետք է լինի: Իհարկե, կլինեն նաև դժգոհողներ, դժգոհ խավ միշտ էլ եղել է բնակչության մեջ, էդ խավը երբեք չի վերանալու»,- ասաց մանկապարտեզի վարիչը: Անդրադառնալով իր ղեկավարած համայնքի բնակիչների սոցիալական վիճակին` Սամվել Գիգոլյանն այն գնահատեց «շատ-շատ վատ»: «Իմ աշխատած 1 տարվա ընթացքում գյուղացիների ապրելակերպի մեջ դրական որոշ տեղաշարժ կատարվել է: Գյուղացիները իրոք, հուսակտրված էին` հիմնականում ոռոգման ջրի պատճառով: Այսօր գյուղում կան մարդիկ, ովքեր ձգտում ունեն հողը մշակելու: Գյուղացիների 2009 թ..ի ոռոգման ջրի վարձավճարները կազմել են 2,3 մլն դրամ, նախկինում այն կազմել է 600 հազար դրամ: Ինչպես նկատում եք, գրեթե 4 անգամ ոռոգման ջրի գյուղացիների վճարած վարձավճարները նախորդ տարվա համեմատ աճել են: Սա նշանակում է` նախորդ տարվա համեմատ 2009 թ.-ին գյուղացիները ավելի շատ հող են մշակել, սակայն, այդուհանդերձ, Ճոճկանում գյուղացիները շատ վատ են ապրում»: Սամվել Գիգոլյանը նաև հայտնեց, որ 2010 թ.-ին «Հազարամյակի մարտահրավերներ» ծրագրով վերանորոգվելու է գյուղի ոռոգման ցանցի 5,3 կմ հատվածը, որի համար ծրագրով նախատեսված է շուրջ 100 մլն դրամ: Ըստ գյուղապետի` դա էականորեն կթեթեևացի գյուղի ոռոգման ջրի հիմնախնդիրը: