Նախօրեին Ռուսաստանի Պետդումայի «Гербовый» սրահում կայացել է հայ-ռուսական միջխորհրդարանական հանձնաժողովի հերթական նիստը, որին մասնակցել է նաև  Ռուսաստանում Հայաստանի դեսպան Օլեգ Եսայանը: ՀՀ ԱԳՆ մամլո ծառայության փոխանցմամբ` բացման խոսքով հանդես է եկել Ռուսաստանի խորհրդարանական հանձնաժողովի համանախագահ Նիկոլայ Ռիժկովը, ով ողջունել է հայ խորհրդարանականներին և նշել, որ միջխորհրդարանական հանձնաժողովը կատարել է լուրջ աշխատանքներ երկու խորհրդարանների արտաքին քաղաքական գործունեությունը համակարգելու հարցում: Հայկական խորհրդարանական հանձնաժողովի համանախագահ Արամ Սաֆարյանը տեղեկացրել է միջխորհրդարանական հանձնաժողովի անցյալ որոշումների կատարման մասին: Անդրադառնալով միջազգային հարթակներում հայ և ռուս պատգամավորների համագործակցությանը` նա  գոհունակություն է հայտնել արձանագրված առաջընթացի վերաբերյալ, խոսել է նաև երկու կողմերի տնտեսական համագործակցության մասին: Հանդիպմանը քննարկվել են միջխորհրդարանական համագործակցությանը վերաբերող երկուստեք կարևորություն ներկայացնող բազմաթիվ հարցեր: