ԼՂՀ Ազգային ժողովի այսօրվա նիստում քննարկվեց «Ազգային  ժողովի կանոնակարգ» օրենքում լրացումներ ու փոփոխություններ կատարելու մասին օրենքի նախագիծը: Նախագծի համաձայն` Ազգային ժողովի մշտական հանձնաժողովների թիվը մեկով կավելանա. ԱԺ-ում կլինի նաեւ կրթության, գիտության, մշակույթի, երիտասարդության եւ սպորտի հարցերով զբաղվող հանձնաժողով:

Սա նշանակում է, որ մյուս խորհրդարանի պատգամավորներից երկուսը եւս հնարավորություն կունենան մշտական հիմունքներով աշխատել ու բարձր աշխատավարձ ստանալ: Խոսքը հանձնաժողովի նախագահի եւ փոխնախագահի մասին է: Հետեւաբար մեկով կավելանա նաեւ մեքենաների թիվը: Այսօրվա նիստում որոշվեց նաեւ փոփոխություն մտցնել մշտական հիմունքներով աշխատող պատգամավորների դրույքաչափերում: Հավասար չափով աշխատավարձ կստանան եւ մշտական հանձնաժողովների նախագահները, եւ նրանց տեղակալները: Նրանց աշխատավարձը կկազմի 250 հազար դրամ: Ի դեպ, ներկայումս այդքան են ստանում միայն հանձնաժողովների նախագահները, իսկ տեղակալները` 200 հազար դրամ: Նիստի վերջում ԱԺ նախագահ Աշոտ Ղուլյանը տեղեկացրեց, որ այս գումարման ԱԺ հաջորդ եւ վերջին նիստը կկայանա մինչեւ ապրիլի 20-ը: