Տեսանյութեր
Լուսանկարներ
Էդվարդ Նալբանդյանը մասնակցել է ԱՊՀ արտգործնախարարների խորհրդի նիստին
Մարտի 26-ին շարունակվեց ՀՀ արտգործնախարար Էդվարդ Նալբանդյանի այցը Մոսկվա: Նույն օրը կայացավ Անկախ պետությունների համագործակցության մասնակից երկրների արտգորնախարարների խորհրդի հերթական նիստը, որին ՀՀ պատվիրակությունը գլխավորում էր արտգործնախարար Էդվարդ Նալբանդյանը:
Ինչպես հայտնում է ՀՀ Արտգործնախարարության մամուլի, տեղեկատվության և հասարակայնության հետ կապերի վարչությունը, նիստի օրակարգը ներառում էր ԱՊՀ գործունեությանն առնչվող երկու տասնյակից ավելի հարցեր, այդ թվում` ԱՊՀ հետագա զարգացման հայեցակարգի իրականացման, հումանիտար բնագավառում համագործակցության խթանման, անվտանգության և միգրացիոն քաղաքականության բնագավառներում փոխգործակցության, իրավապահ մարմինների միջև համագործակցության ակտիվացման և մի շարք այլ հարցերը:
Նախարարները հավանության արժանացրեցին և ԱՊՀ պետությունների ղեկավարների հաստատմանը ներկայացրեցին Մեծ հայրենական պատերազմում հաղթանակի 65-ամյակի առթիվ ընդունվելիք ուղերձի նախագիծը:
Նույն օրը ԱՊՀ արտգործնախարարների խորհրդի շրջանակներում տեղի ունեցավ Էդվարդ Նալբանդյանի հանդիպումը Ուկրաինայի նորանշանակ ԱԳ նախարար Կոնստանտին Գրիշենկոյի հետ:
Նախարար Նալբանդյանը նշեց, որ սերտ համագործակցության ակնկալիք ունի` երկու երկրների հարաբերությունները որակապես նոր մակարդակի բարձրացնելու համար:
Էդվարդ Նալբանդյանն ու Կոնստանտին Գրիշենկոն մտքեր փոխանակեցին տարածաշրջանային և միջազգային խնդիրների և դրանց կարգավորման ուղիների, ինչպես նաև քաղաքական երկխոսության ակտիվացման, իրավապայմանագրային դաշտի ընդլայնման, միջազգային կազմակերպություններում համագործակցության շուրջ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել