ԼՂՀ վերահսկիչ պալատի խորհրդի երեկվա նիստի օրակարգային հարցերից մեկը վերաբերում էր դատական դեպարտամենտին պետական բյուջեից հատկացված միջոցների օգտագործման, պետական սեփականության կառավարման եւ օգտագործման նկատմամբ վերահսկողության արդյունքների վերաբերյալ ընթացիկ հաշվետվությանը:

ՎՊ առաջին բաժնի պետ Գուրգեն Հարությունյանի ներկայացմամբ, ստուգումների արդյունքում պարզվել է, որ 2008-2009թթ. դատական դեպարտամենտի հաշվապահական հաշվառումը վարվել է անբավարար մակարդակով: Որոշ դեպքերում ԼՂՀ գերագույն դատարանի եւ ընդհանուր իրավասության առաջին ատյանի դատարանի կողմից կատարվել են, համապատասխանաբար, 104.8 հազ. դրամի եւ 70.0 հազ. դրամի չափով տնտեսագիտական դասակարգման հոդվածներով չնախատեսված ծախսեր: Ընդհանուր իրավասության դատարանի կողմից կատարվել է նաեւ նախահաշվով չնախատեսված ծախս` 1062.2 հազ. դրամի չափով (ոչ նպատակային ծախս), ինչը, ըստ ՎՊ մասնագետների, ենթակա է վերականգնման պետական բյուջե: ՎՊ մասնագետները պարզել են նաեւ, որ վերահսկվող օբյեկտում խախտվել է «Դատական ծառայության մասին» ԼՂՀ օրենքի 33-րդ հոդվածի 3-րդ կետի պահանջները, որի արդյունքում ավելի է վճարվել 491.2 հազ. դրամ աշխատավարձ, ինչը նույնպես ենթակա է վերականգնման: Մի շարք դեպքերում, խախտելով ԼՂՀ աշխատանքային օրենսգրքի 213-րդ հոդվածի 3-րդ կետի պահանջները, ամբողջ տարվա ընթացքում, ավելի վճարված աշխատավարձը ճշգրտվել եւ պահվել է աշխատակիցներից: Խախտվել է նաեւ «Դատական ծառայության մասին» ՀՀ օրենքի 10-րդ հոդվածի 6-րդ մասի 1-ին կետի պահանջը. դատավորների օգնականների պաշտոններում են նշանակվել բարձրագույն կրթություն չունեցող 3 անձինք: Վերահսկվող օբյեկտում այլ տեսակի խախտումներ են արձանագրվել, չհաշվարկված, ոչ արդյունավետ ծախսեր եւ այլն: Վերահսկիչ պալատի նախագահի որակմամբ` իրենց պրակտիկայում վերահսկվող ոչ մի օբյեկտում նման վատ վիճակ չի եղել: ՎՊ-ն մի շարք առաջարկություններ է արել դեպարտամենտին` արձանագրված թերությունների վերացման ուղղությամբ: Դեպարտամենտը մեկամսյա ժամկետում ՎՊ-ին պետք է ներկայացնի գրավոր տեղեկություն` հայտնաբերված խախտումները վերացնելու վերաբերյալ: