«Սարդարապատ» շարժման նախաձեռնող խումբը մարտի 26-ին Մարդու իրավունքների և ժողովրդավարության ինստիտուտի (ՄԻԺԻ) գրասենյակում կազմակերպել էր հերթական կլոր սեղանը` Վաշինգտոնում տեղի ունեցած «Սփյուռք-Հայաստան, անկախության 20 տարի» քաղաքական կոնֆերանսի արդյունքների վերաբերյալ: Միջոցառման բանախոս, հրապարակախոս Մարինե Պետրոսյանը, ով մասնակցել էր կոնֆերանսի աշխատանքներին, ներկայացրեց վաշինգտոնյան հանդիպումների և կոնֆերանսի ընթացքում մի շարք զեկույցներից իր տպավորություններն ու նկատառումները: Վաշինգտոնյան կոնֆերանսի մասնակիցները տեսակետ են հայտնել, որ Հայաստանի իշխանություններին անվերապահ աջակցություն ցուցաբերելու արտերկրի հայության մի մասի որդեգրած դիրքորոշումը նպաստել է Հայաստանում հակաժողովրդավարական գործընթացների ամրապնդմանը` միաժամանակ փաստելով, որ ժողովրդավարական սկզբունքները նույնքան կարևոր են և անհրաժեշտ ավանդական կուսակցությունների, ազգային և հասարակական կազմակերպությունների գործունեության համար: Կլոր սեղանի մասնակիցները կարծիքներ հնչեցրին այն մասին, որ մարտիմեկյան ողբերգությունը և հայ-թուրքական արձանագրությունների վավերացման գործընթացը դարձան պատճառ արտերկրում բնակվող հայությանը երկարատև թմբիրից արթնանալու համար, որի արդյունքում կարող են ծնվել Հայաստան-Սփյուռք հարաբերությունների սպասարկման համար նոր ձևափաչեր: Իրողությունները վկայում են, որ և արտերկրում, և Հայաստանում առկա քաղաքական դաշտում ավանդական կուսակցությունների մենաշնորհը վաղուց իրեն սպառել է, և նոր ձևաչափերով ազգային-քաղաքական կազմավորումների ստեղծման անհրաժեշություն է առաջացել: Քննարկման ընթացքում կարծիք հնչեց, որ «Սփյուռք-Հայաստան, անկախության 20 տարի» քաղաքական կոնֆերանսը թերևս ամենակարևոր նմանօրինակ միջոցառումն էր վերջին շրջանում, որն արժանի է հետագա ուսումնասիրության ու վերլուծության: «Սարդարապատ» շարժման նախաձեռնող խումբ 26.03.10 Երևան