Ս/թ ապրիլի 1-14-ը «Երկրի Օր 2010 Հայաստան»-ի շրջանակներում տեղի է ունենալու ստորագրահավաք` ի աջակցություն «կանաչ ապրելակերպ»-ին Հայաստանում: Ստորագրահավաքը նպատակ ունի առաջարկներ ներկայացնել ՀՀ կառավարությանը և խրախուսել մասնավոր սեկտորի կազմակերպություններին` որդեգրել «կանաչ ապրելակերպ» մասնավորապես` • մեծացնել մեծ տարողունակությամբ և էկոլոգիապես մաքուր տրանսպորտային միջոցների քանակը, • նպաստել զտիչների արտադրության հիմնադրմանը ՀՀ-ում և նրանց օգտագործմանը տրանսպորտային միջոցներում, • տրամադրել արտոնյալ պայմաններ վերամշակված արտադրանքի արտադրության խրախուսման համար` մասնավորապես վերամշակված թղթի արտադրման համար, • խրախուսել այն առևտրական կազմակերպություններին, որոնք պոլիէթիլենային տոպրակներից անցում կկատարեն վերամշակված թղթից պատրաստված տոպրակներին, • թղթի օգտագործումը նվազեցնելու նպատակով ներդնել և կիրառել փաստաթղթերի էլեկտրոնային ձևակերպման եղանակը, • նվազեցնել ջրի և էլեկտրաէներգիայի օգտագործումը, խրախուսել բոլոր այն մասնավոր կազմակերպություններին, որոնք կորդեգրեն նույն քաղաքականությունը, • աջակցել էներգիայի արտադրման այլընտրանքային (քամու և արևի) եղանակների ներդրման գործընթացին ՀՀ-ում, • սահմանել ամենամյա մրցանակներ “կանաչ ապրելակերպ” որդեգրած կամ բնապահպանական շարժման մեջ ներդրում ունեցած  կազմակերպություններին և մասնավոր անձանց: «Օրհուս» կենտրոնի փոխանցմամբ` առաջարկվող քայլեր իրագործելու դեպքում կխթանվի «կանաչ ապրելակերպ»-ը և կբարելավվի էկոլոգիական իրավիճակի Հայաստանում, կմեծացնա մեր երկրի դերը և վարկանիշը համաշխարհային բնապահպանական շարժման մեջ: «Երկրի Օր 2010 Հայաստան»-ի կազմակերպիչներն ու աջակիցներն են` «Երիտասարդ կենսաբանների ասոցիացիա» հ/կ-ն, Էկոլոգիական տեղեկատվության հասարակական «Օրհուս» կենտրոնները, Հայաստանի Ծառատունկ Ծրագիրը, ԵՊՀ ուսանողական գիտական ընկերությունը, «Հայաստանի թռչունների պահպանման միություն» հ/կ-ն, «Կոնգրես» հյուրանոցը, ԵԱՀԿ Երևանյան գրասենյակը, Բրիտանական Խորհուրդը: