Օրերս Ղարաբաղի Ազգային անվտանգության ծառայության աշխատակիցները դրամաշորթություն կատարելու պահին ձերբակալել են Արցախի պետական համալսարանի ճարտարագիտական ֆակուլտետի ավագ դասախոս Գեւորգ Դադայանին: Այս մասին երեկ մամուլի ասուլիսի ժամանակ հայտարարել է ԼՂՀ գլխավոր դատախազ Արշավիր Ղարամյանը` խոսելով կաշառակերության դեմ պայքարի շրջանակներում իրականացվող աշխատանքների մասին:

Նրա խոսքերով, դասախոսն ուսանողներից պահանջել է որոշակի գումար` դիպլոմային աշխատանքի համար: Պարզվում է, որ դիպլոմային աշխատանքն արժե 80 հազար դրամ, որն էլ վերցնելու պահին դասախոսը ձերբակալվել է: Սա ի դեպ, Արցախի պետական համալսարանում դրամաշորթության եւ գումարներ պահանջելու միակ դեպքը չէ: Ինչպես ավելի վաղ հայտնել էինք, նման պատճառով այս տարի համալսարանի 5 դասախոսի զրկել են քննություններ եւ ստուգարքներ ընդունելուց: Կրթության եւ գիտության նախարար Վլադիկ Խաչատրյանը հայտնել է, որ նրանք պատմության, մանկավարժության եւ կիրառական մաթեմատիկայի ամբիոններից են, ովքեր քննությունների ժամանակ գումար էին պահանջել ուսանողներից, սակայն նախընտրել է անուններ չտալ: Իսկ ահա գլխավոր դատախազ Արշավիր Ղարամայանը գտնում է, որ կաշառակերության դեմ արդյունավետ պայքարի եւ այդ արատավոր երեւույթն արմատախիլ անելու համար պետք է նշվեն նաեւ անուններ: