2010թ. առաջին եռամսյակում քաղաքացիական ծառայության համակգարում ընդգրկված պետական 44 մարմիններում ընդհանուր առմամբ 290 թափուր պաշտոնների զբաղեցման մրցույթ է հայտարարվել, որոնց մասնակցել է 2026 քաղաքացի: Հայտարարվածներից չի կայացել 40 մրցույթ` դիմորդ չլինելու պատճառով, իսկ 30 մրցույթներ եղել են անարդյունավետ, քանի որ դրանց արդյունքում հաղթողներ չեն գրանցվել: Հաշվետու ժամանակահատվածում ամենաշատ թափուր պաշտոնների զբաղեցման մրցույներ հայտարարվել են ՀՀ կապի և տրանսպորտի նախարարության աշխատակազմում (թվով 24), ինչպես նաև ՀՀ Սփյուռքի նախարարության և ՀՀ Կառավարությանն առընթեր անշարժ գույքի կադաստրի պետական կոմիտեի աշխատակազմերում (թվով 21-ական): Միջին հաշվով կայացած մեկ մրցույթին մասնակցելու համար հայտ է ներկայացրել 8 քաղաքացի, սակայն նրանց միայն կեսն է ներկայացել մրցույթներին: Քաղաքացիների հետաքրքրվածության մակարդակը բարձր է հատկապես քաղաքացիական ծառայության կրտսեր թափուր պաշտոնների զբաղեցման մրցույթների նկատմամբ: Միջին հաշվով յուրաքանչյուր կրտսեր թափուր պաշտոնի զբաղեցման մրցույթի մասնակցում է 8 քաղաքացի:  2010թ. ընթացքում քաղաքացիների կողմից մրցույթների մասնակցության ամենաբարձր ցուցանիշները գրանցվել են ՀՀ աշխատանքի և սոցիալական հարցերի նախարարության (կայացած 20 մրցույթին` 115 մարդ) և ՀՀ տրանսպորտի նախարարության (կայացած 23 մրցույթին` 103 մարդ) աշխատակազմերում: Այս տարվա ընթացքում արձանագրվել է քաղաքացիների կողմից մրցույթների արդյունքներն իրենց մասով բողոքարկելու երկու դեպք, որոնք, սակայն, ՀՀ քաղաքացիական ծառայության խորհրդի կողմից չեն բավարարվել: Այս մասին հայտնում է Քաղաքացիական ծառայության խորհրդի մամլո ծառայություն: