Ապրիլի 5-ին` ժամը 21.00-ի սահմաններում, Երևանի Դավիթ Անհաղթի փողոցի թիվ 21 հասցեում գտնվող «Սթար» սուպերմարկետի մոտ «Հոնդայի Սոնատա» մակնիշի ավտոմեքենայի վարորդ Վահան Եղիազարյանը վրաերթի է ենթարկել Գայանե Բաբայանին և անզգուշությամբ պատճառել մահ: Փաստի առթիվ ապրիլի 6-ին ոստիկանության Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քր. օր.-ի 242 հոդվածի 2-րդ մասով հարուցվել է քրեական գործ և կատարվում է նախաքննություն: Նախաքննության ընթացքում նշանակվել է դատաավտոտեխնիկական փորձաքննություն: Ապրիլի 9-ին ստացվել է փորձագետի եզրակացությունը, որով հիմնավորվել է ավտովարորդ Վահան Եղիազարյանի կողմից «ճանապարհային երթևեկության կանոնների» և «ճանապարհային երթևեկության անվտանգության ապահովման մասին» ՀՀ օրենքի համապատասխան կետերի խախտման հետևանքով վրաերթ կատարելու հանգամանքը: Նույն օրը Վահան Եղիազարյանին մեղադրանք է առաջադրվել ՀՀ քր. օր.-ի 242 հոդվածի 2-րդ մասով: Առաջադրված մեղադրանքում Վահան Եղիազարյանն իրեն մեղավոր է ճանաչել և տվել ինքնախոստովանական ցուցմունքներ: Միջնորդություն է ներկայացվել Կենտրոն և Նորք-Մարաշ վարչական շրջանների ընդհանուր իրավասության դատարան` մեղադրյալ Վահան Եղիազարյանի նկատմամբ խափանման միջոց կալանք կիրառելու մասին և նույն օրը դատարանը բավարարել է միջնորդությունն ու Եղիազարյանի նկատմամբ որպես խափանման միջոց է կիրառվել կալանավորումը: Նույն օրը մեղադրյալը տեղափոխվել և գտնվում է ՀՀ ԱՆ «Նուբարաշեն» քրեակատարողական հիմնարկությունում: Այս մասին հայտնում է ՀՀ ոստիկանության հասարակայնության հետ կապի և լրատվության վարչությունը: