Հարցազրույց ՀՀ ոստիկանության Լոռու մարզային վարչության Թումանյանի բաժնի պետ, ոստիկանության փոխգնդապետ Արթուր Հարությունյանի հետ: Պրն Փոխգնդապետ, ինչպե՞ս կգնահատեք ոստիկանության Թումանյանի բաժնի օպերատիվ աշխատանքներն այս տարվա առաջին եռամսյակում: 2010թ.-ի առաջին եռամսյակում բաժնում գրանցվել է 73 հանցագործության դեպք, բացահայտումը կազմում է 95,1 տոկոս: Քրեական հետախուզության գծով արձանագրվել է 50 հանցագործություն, որից բացահայտվել են 26-ը, իսկ 23-ի բացահայտումն ընթացքի մեջ է: Մենք չբացահայտված հանցագործության դեպքեր առաջին եռամսյակում չունենք: Նախկին տարիներից, 5-6 տարվա վաղեմություն ունեցող 2 հանցագործության դեպք ենք բացահայտել. մեկը անասնագողություն է Աքորի գյուղից, մյուսը` Դսեղ գյուղի քաղաքացիներից մեկի բնակարանի դռան հրդեհման գործն է: Քանի՞ աշխատակից ունի ոստիկանության Թումանյանի բաժինը: Ընդհանուր քանակով բաժնում աշխատում են 70 ոստիկաններ: Ինչպե՞ս կգնահատեք Ալավերդի քաղաքի օպերատիվ իրավիճակը, բնակչության հանցագործության հակումների դրսևորումների աստիճանը: Հանցագործության ո՞ր տեսակներն են առավել բնորոշ թումանյանցիներին: Մեր տարածաշրջանում օպերատիվ իրավիճակը մեր կողմից վերահսկվում է: Տարածաշրջանը, եթե ընդհանուր առմամբ համեմատենք մյուսների հետ,  հանցագործություններն ավելի մեղմ են, որովհետև այստեղ բնավորությամբ ավելի հանգիստ ու մեղմ ժողովուրդ է ապրում: Հիմնականում հանցագործության դեպքերը պայմանավորվում է սոցիալական ծանր պայմաններով: Լուրջ հանցավոր խմբավորումներ չունենք: Ունենք արձանագրված թմրանյութերի հետ կապված հանցագործություններ: Քանի՞ թմրամոլներ եք հայտնաբերել: Առաջին եռամսյակում հայտնաբերել ենք 7 թմրամոլներ: Վանաձոր-Ալավերդի-Բագրատաշեն մայրուղու եզրերին գտնվող 10-ից ավելի տնակների շուրջ պտտվում են տարբեր խոսակցություններ: Ճի՞շտ է արդյոք, որ դրանք տարածաշրջանի մարմնավաճառ կանանց հավաքատեղիներն են: Մենք ունենք մարմնավաճառների համապատասխան հաշվառումներ, և դա բաժնի կողմից շատ խիստ հսկողության տակ է: Ճանապարհաեզրերի այդ տնակները, որտեղ  հաց են ուտում, չունեն հյուրանոցային պայմաններ և այնտեղ մարմնավաճառությամբ զբաղվելու պայմաններ չկան: Նրանք մեր օպերատիվ տեսադաշտում են. միշտ հսկողության տակ են: Բոլորին` մեր ունեցած մարմնավաճառներին, մենք ճանաչում ենք: Նրանք հաշվառման մեջ են: Որքա՞ն է հաշվառված մարմնավաճառների թիվը: Մեծ մասը մեր տարածքից տեղափոխվել են: Հաշվառման մեջ եղած անձինք հիմնականում Երևանում են աշխատում: Այստեղ գալիս-գնում են: Ի՞նչ աշխատանքներ են տարվում անչափահասների հետ: Բաժնում հաշվառված են 11 անչափահասներ: Առաջին եռամսյակում անչափահասների կողմից գրանցվել է հանցագործության 2 դեպք, երկուսն էլ բացահայտվել է:  Իսկ 2009թ.-ին գրանցվել է անչափահասների 5 հանցագործություն: Մենք  անչափահասների հետ ավելի շատ փորձում ենք իրականացնել պրոֆիլակտիկ աշխատանքներ: Ալավերդի համայնքում գործում է վերականգնողական կենտրոն, որտեղ աշխատում են հոգեբաններ և մանկավարժներ, որպեսզի անչափահասները չմտնեն ոստիկանության բաժին, մեր աշխատակիցները հաշվառված անչափահասների հետ աշխատում են այդ վերականգնողական կենտրոնում: Հաշվառված անչափահասների դաստիարակությամբ զբաղվելու համար մեր պահանջով ՏԻՄ մարմինների անչափահասների հանձնաժողովների կողմից նշանակվում են շեֆ-դաստիարակներ: Վերջերս Օձունի 9-10-րդ դասարանների աշակերտների համար դպրոցների կողմից անցկացված կոռուպցիայի թեմայով ընդլայնված միջոցառմանը մասնակցել են նաև մեր անչափահասների բաժնի աշխատակիցները և, ինչպես պատմում են նրանք, քննարկումը բուռն է եղել: Ի՞նչ ցուցանիշներ կան անասնագողության դեմ պայքարում: Վերջերս անասնագողություն է կատարվել Կաճաճկուտ գյուղում: Հանցագործությունը բացահայտված է, նախաքննության փուլում է, հանցագործները  գտնվում են կալանքի տակ: Գողացողը Տաշիրի բնակիչ էր, որը, համաձայնության գալով Կաճաճկուտ գյուղի բնակիչներից մեկի հետ, սարերում բաց թողած 10 ձիեր էին գողացել: Գողոնը տարել էին Կալինինո, մորթել և վաճառել: Պրն Հարությունյան, Ձեր պաշտոնավարման մեկ տարվա ընթացքում Ալավերդի քաղաքում 2 սպանություն է գրանցվել: Կասկածելի անձանց հնարավոր չէ՞ հսկողության տակ վերցնել: Սպանության հանցատեսակը երբեք հնարավոր չէ կանխատեսել: Դա այն հանցատեսակն է, որը դժվար է կանխատեսվում: Բնական է, եթե կան քրեական ակտիվ տարրեր, հնարավոր է կասկածել: Լինում են սպանություններ, որոնց հեղինակնները նախկինում դատապարտված անձինք են: Այդ դեպքում մեր կողմից իրականացվում է հսկողություն: Սակայն մեզ մոտ գրանցված առաջին սպանության փաստով Կարեն Սոխակյանը Ալավերդիում չի բնակվել. նա ապրել է Մոսկվայում: Եվ նրա ու վերջինիս սպանողի` Սպարտակ Մանուչարյանի տարաձայնությունը եղել է այնտեղի քրեական աշխարհի կամ իրենց անձնական տարաձայնություն: Ես Մոսկվայի մասին կոնկրետ ոչինչ չեմ կարող ասել, որովհետև Մոսկվայի հետ կապված նախաքննություն կա: Ինձ թվում է` ավելի մանրամասն նրանք կիմանան. դրանով զբաղվում է Վանաձորի քննչական բաժինը: Իսկ ինչ վերաբերում է սպանությունների կանխատեսմանը, դա հնարավոր չէ: Մտածել, որ կնոջ քեռին պետք է սպանի սպանողի եղբորը, ո՞նց կարող ես կանխատեսել: Մենք պրոֆիլակտիկ աշխատանքներ միշտ էլ տանում ենք այդ ուղղությամբ, որովհետև ծանր, ամենածանր հանցագործությունն է սպանությունը: Ամեն դեպքում, ես կարծում եմ, որ այդքան մեծ հնչեղություն ստացած մեզ մոտ կատարված սպանությունները կրիմինալ աշխարհի դրսևորումներ չեն: Ոստիկանության Թումանյանի բաժինը չբացահայտված սպանությունների քանի՞ գործ ունի: Ունենք նախկինում կատարված ու չբացահայտված սպանությունների 7 դեպք: