Բուզանդ 83 հասցեում բնակվող Աբրահամյանների ընտանիքը դիմել էր Վարչական դատարան՝ պահանջելով քաղաքապետարանին պարտավորեցնել իրենց սեփականության իրավունքը ճանաչելու վերաբերյալ ընդունել բարենպաստ վարչական ակտ: Քաղաքապետարանն էլ հակընդդեմ հայց էր ներկայացրել դատարան՝ ընտանիքին տնից վտարելու պահանջով: Քաղաքապետարանի հայցը չէր ընդունվել, որովհետեւ այն կապ չուներ Աբրահամյանների հայցի հիմքի հետ եւ բացի այդ՝ Վարչական դատարանի իրավասությունից դուրս է ընտանիքին վտարելու մասին որոշում կայացնելը: Սակայն քաղաքապետարանը չի պատրաստվում հրաժարվել ընտանիքին փողոց նետելու ցանկությունից. առաջիկա օրերին այդ պահանջով առանձին հայց կներկայացվի ընդհանուր իրավասության դատարան: Մինչ այդ Աբրահամյանների շահերը ներկայացնող փաստաբանը լրացրել է հայցի հիմքը՝ ավելացնելով եւս մեկ օրենք, որը հիմնավորում է իրենց պահանջը: Հիշեցնենք, որ տասնամյակներ շարունակ Բուզանդ 83 հասցեում բնակվող Աբրահամյանների ընտանիքը 1991 թվականից հաշվառվել է այդ հասցեում եւ մինչ օրս բարեխղճորեն օգտագործել է այն, սակայն նրանց թույլ չեն տվել տունը սեփականաշնորհել, իսկ 2007 թվականին ՀՀ Կառավարության որոշմամբ` նրանց տան տարածքը ճանաչվել է բացառիկ գերակա հանրային շահ եւ վաճառվել հայտնի գործարար, «Ֆլեշ» ՍՊԸ-ի սեփականատեր Բարսեղ Բեգլարյանի որդուն` անհատ ձեռներեց Հայկ Բեգլարյանին: Իսկ Երեւանի քաղաքապետը որոշում է կայացրել՝ Բուզանդ 83 հասցեի նկատմամբ ճանաչել քաղաքապետարանի սեփականության իրավունքը: Այդ որոշման պատճեն քաղաքապետարանի փաստաբանը ներկայացրել է վարչական դատարանին եւ հայցվոր Աբրահամյանների ընտանիքին: Աբրահամյանների փաստաբան Էդգար Բադեմյանն «Հետքին» տված հարցազրույցում ասաց, որ իրենք պատրաստվում են դատարան բողոք ներկայացնել քաղաքապետարանի որոշման դեմ. «Այդ որոշումը չի կարող ապրել, որովհետեւ այդ դեպքում կմերժեն մեր հայցադիմումը»,- ասաց փաստաբանը: Նշենք, որ Էդգար Բադեմյանը որպես հայցի ապահովման միջոց բազմիցս միջնորդել է արգելանք դնել Բուզանդ 83 հասցեում գտնվող մոտ 60 քմ մակերեսով բնակելի տան վրա, որպեսզի մինչ դատական ակտի կայացումը քաղաքապետարանը չփորձի քանդել այն: Հերթական միջնորդությունը Վարչական դատարանը մերժել է ապրիլի 12-ին կայացած դատական նիստում: Քաղաքապետարանի շահերը ներկայացնող փաստաբան Գեղամ Թադեւոսյանը դատարանից ժամանակ է խնդրել՝ հայցի լրացված հիմքին ծանոթանալու համար եւ դատական նիստը հետաձգվել է երկու շաբաթով: