Մերձդնեստրի Մոլդովական Հանրապետությունում հատուկ ծառայությունների կողմից ապրիլի 7-ին ձերբակալված և պետական դավաճանության մեջ մեղադրվող հայազգի լրագրող Էռնեստ Վարդանյանի հարազատները դիմել են Ռուսաստանի հայերի միության նախագահ Արա Աբրահամյանին: Նրանք Արա Աբրահամյանի օգնությունն են խնդրում` Էռնեստ Վարդանյանի կալանքը  որպես խափանման միջոց փոխարինելու հարցում, ապահովելու նրա պաշտպանության իրավունքը իր իսկ ընտրած փաստաբանի միջոցով, ինչպես նաև ապահովել բաց դատաքննություն և կիրառել Մարդու իրավունքների եվրոպական կոնվենցիայի չափանիշները: Հարազատները մտահոգվում են այն փաստով, որ ի սզբանե Էռնեստի գործի քննությունը սկսվել է օրենքի խախտումներով: Քաղաքային դատարանը փակ դռների հետևում է կայացրել նրա կալանքի երկարացման որոշումը: Դատաքննությանը թույլ չեն տվել մասնակցելու ոչ միայն ընտանիքի անդամներին, այլև պետության տրամադրած փաստաբանին: Իսկ անկախ փաստաբանին մինչ օրս թույլ չեն տալիս տեսակցել Էռնեստին: «Նկատի ունենալով այս հանգամանքները` մենք կասկածում ենք, որ գործի հետագա քննությունը ևս կանցկացվի օրենքի սահմաններում»,- նշված է նամակում: Հարազատները նաև անհանգստանում են Էռնեստի առողջական վիճակով: Էռնեստ Վարդանյանը ծնվել է 1980 թ. Գյումրիում: Երկրաշարժից հետո ընտանիքը տեղափոխվել է Մոլդովա: Ավարտել է Քիշնեւի համալսարանի քաղաքագիտության ֆակուլտետը: Մոլդովայի հայերի միության վարչության անդամ է: Ունի երկու անչափահաս երեխա` 6-ամյա տղա եւ 9-ամյա աղջիկ: