Այսօրվա մամուլի ասուլիսին «Օրինաց երկիր» կուսակցության փոխնախագահ, Արտակարգ իրավիճակների նախկին նախարար Մհեր Շահգելդյանին հարցեր ուղղվեցին նրա պաշտոնավարման ժամանակ ԱԻՆ-ի` ՊՆ-ից ստացած 2,5 մլրդ դրամի ալյուրի վերաբերյալ: Ալյուրը, ըստ մամուլի հրապարակումների, փչացվել և կես գնով վաճառվել էր: Գլխավոր դատախազությունից տեղեկացրին, որ Ձեր պաշտոնավարման ժամանակ Ձեր նախարարությունում 2,5 մլրդ դրամի ալյուրի հետ կապված քրեական գործը փոխանցվել է Հատուկ քննչական ծառայություն, և մամուլում բազմաթիվ տեղեկություններ կան, որ Սամվել Ալեքսանյանի հետ ինչ-որ գործարք է եղել, այդ ալյուրը վաճառվել է և այլն: Դուք հրավիրվե՞լ եք դատախազություն: Գործարքի մասին խնդիր չկա, ես նույնպես բարձրաձայնել եմ հիմնահարցը, ընթանում է քննություն: Ես կարծում եմ` ընթացքում իրենք այդ խնդիրների պատասխանները կտան: Սրանք են մոտեցումները: Դուք հրավիրվե՞լ եք դատախազություն: Ես Ձեզ արդեն պատասխանեցի ամբողջությամբ: Ես հիմնախնդիրը բարձրացրել եմ, ներկայացրել եմ: Այսօր վարվում է քննություն: Քննությունն իր արդյունքները կտա, մնացած բոլոր պատասխանները կստանաք: Ըստ որոշ տեղեկությունների` խնդրին կառավարության նախաձեռնությամբ է ընթացք տրվել: Կրկնում եմ, որովհետև ընթացքում այդ մասին ինֆորմացիա էլ կլինի. միանշանակ հիմնախնդիրը բարձրացվել է իմ կողմից, միանշանակորեն այստեղ խնդիրը այդ գործարքի մասին չի, և մնացածը` վարվում է քննություն. Քննությունը պատասխանները կտա: Ժամանակից առաջ չանցնենք: Դուք հետամուտ լինելո՞ւ եք, որ դա ամբողջությամբ բացահայտվի: Մենք միշտ արդարության կողմնակից ենք եղել: Եթե կլինեն մեղավորներ, մեղավորները իրենց պատասխանը կտան: