Խղճի օրենք կա և ամոթի դատ
Գիտակցությունը թմրեցնել դեռ ոչինչ, կարելի է, ասենք ալկոհոլի մեծ չափաբաժնի կամ հոգեներգործուն նյութերի ազդեցությամբ, երբեմնակի իրենց ներշնչանքի մեջ երևակայել փորձող որոշների պնդմամբ` անզգայացման երանությամբ (ասել կուզի նիրվանա՞), ինչն իրականում հոգեհոսանքի ուղղորդումն է եթերից վեր` չգոյի, աննյութի ուղեծրով:
Բայց թերևս իրավացի է ժխտել կատարյալ անզգայություն` թողտվություն ընդունելով միակ բացառությամբ, երբ անխուսափելին անփույթ մոռացկոտությամբ այցետոմսն է թողնում` ճանկռտված ինքնագրով` Մահ (և կամ ոչ իսկ նույնիսկ ա՞յս միջոցին): Այնինչ Նորին մեծությունն էլ ստուգապես ուժատ է ՄԻԱԿ-ի հանդեպ և գեթ համառելու փորձ էլ չի անում (ապարդյուն ճիգեր). մահվան տուրևառից հետո անգամ հողն անմեղ արյուն չի ընդունում (մեղք է)` արյան օրենքով սպասելով մկրտության… Կարելի է փորձվել հազար ու մի դերերում, հազար ու մի ձևերով` ձայնարկելով երաժշտական ձայնի տարբեր բարձրություններով` տենոր, սոպրանո, բարիտոն, դենդի-պճնամոլի մոդայասիրությամբ փոփոխելով բարոյապես մաշված հագուստ-կապուստը, հայացքում ցոլացնելով չապրված զգացում-զգացմունքների լուսափոխություն, պատահածի հետ պատահական (ցնորամիտ քամու զվարճահաճությամբ աղբանոց նետված թիթեղյա տուփի ու ծառը թաղած այրի տերևի անկիրք միություն) բեմադրելով սեր-ներկայացում, որ բովանադակ տիեզերքում վիճակաված է լոկ մեկ անգամ ու լոկ նրան, ով շան բախտը ճանկել գիտի : Էլի ինչե¯ր , ինչե¯ր ասեք… Չսպիացող վերքի մրմուռն էլ կարելի է փարատել ու դեռ փշրված սրտի կտորտանքներն էլ ի մի բերելով` մի կոնաձև օրգան կեղծել…Բայց կա մարդու մեջ մի Բան ու էդ Բանի անունն է ԽԻՂՃ… Ինչ-որ տեղից (ներսից երևի) սկզբում հազիվ լսելի, խուլ ահազանգող, թակթկում-թմբկահարումով խուժած ու հետզհետե ահագնացող հռնչյուն-խորդյունով իր բարիգալուստն աղմկող պնդաճակատ մեկը սառցային մագիլներով չանչում է ուղեղդ, ու սկսվում է … թունավորումը… ախտորոշումը` խղճմտանքի համախտանիշ… վարակակիր ես ու այլևս անդարձ… Դա արթնացում է, արած-չարածի ինքնախոստովանանք-ինքնանկեղծացում, ինքնահաշտեցու՞մ` զուգադիպվածով գուցե: Գալիս է ողորմեագոչը մեղայականով, ափսոսանք-զղջմամբ, հուդաների, կայենների, դեմասների, մակբեթների… անդեմ դիմառնությամբ, իսկ ապաշավանք-զղջագինը մենմիակն է` ուրացողի, դավաճանի, ոճրագործի … դափնեխարան… հատուցումն էլ` ըստ օրինի մեղսաչափով` պիղատոսի անցնելիքը երկու հազար լուսին ճանապարհ է … Սկսվում է սատանայի դիմակահանդեսի էլիտա-հանրույթը (կեղծիք-հասարակությունը մերօրյա ) կազմող դիմակ-ձորձերի շքերթը. կյանքի հատակն ընկածի ճակատագրին անտարբեր մի ոմն բարեգործ, որի զավակի քիմքին անախորժ է տնանկ երեխաներից եկող հոտը, այնինչ մայրն ի կատար է ածում իր կյանքի գործը. քայլքը ոգեղենին վստահած, ամբիոններից անդուլ ճառող մեծազդեցիկ գիտայր (նախկին կնագետի փառքուպատվից պահպանված միակ սեռընկալունակ` տեսողական զգայարանով), որի ձեռքն, անտեղյակ այլև հակառակ տիրոջ կամքին, բնազդական ինքնամղումով անշուշտ, ավելի հաճախ ուսանողի, քան իր գրպանում է հայտնվում: Ընդունված կարգ է` պատահականությունները թույլատրելի-ներելի են, այնինչ վերջինս պատահական- օրինաչափությունների շարքի երևույթ է. հաջի աղա (արյունակցին ուրացող), որ խիղճն առժամանակ լռեցնելու կամ մեկընդմիշտ նրան բանտելու հույսով անլուր մեծագործություններ է հղանում, օգնության ձեռք պարզում աջուձախ, ափսոս միայն, որ գերմարդկային որևէ լարումով անհնար է ձգվել փրկչական այդ ձեռնտվությանը . ձեռքերը լվացած պիղատոս, որն ամոթալի փութաջանությամբ շարական շարականի ետևից է հնչեցնում ու խաչքավորության աչքակապուկով տուրքը հատուցում իր մեղքերի` չաստվածներին անիծյալ. անառակության որջերում թալթավալվող-խրախճանող հափրամոլին կավատուհու օձագալար գարշ շարժվածքով ճաշացանկը հրամցնել շտապող հանըմ սուրբիկ (պատվիրատուն խիստ չէ. մսացուն թարմ լինի, մնացածը` սուկի, բեկոն… , մեկ հաշիվ է, կարելի է աչք էլ փակել). մարմնի պահանջատիրոջ իրավունքով սկզբում գուցե տհաճությամբ, հետո նույնիսկ հաճությամբ, իսկ վերջում էլ զվարճությամբ զսպագոտին ձգող-նետող ջաննաթի հուրիներ, որոնք մեծահույս են` լլկվելով ողջ գիշերն ի լույս` լուսաբացի հետ դառնալու են կույս… Ու այս աղտին դիմահար` ծեծկված-ծռմռծված մեղքությունը խև` աղբանոցի բարիքները ուսաբարձող հաշմ-ողջանադամ մուրացիկ, հրապույրներն սպառած անքիթ (էգությանը խոնարհվելով` նե), որ կիրքն է բորբոքում մի թլպատված, մեն-մենավոր պողոտայի, աստծո տաճարում կերկեր ձեռքով վրան մի կերպ խաչ հանող ընկեցիկ (ինչի՞ն է տեսնես գոհանում)… Կեղծիքից վատն էլ կա` գարշահոտող բորոտամարմինը հանդերձներում թաքցրած կիսա - , ուրեմնև`ամենակեղծիքը, որ վարժանքից հմտացած ձեռքով դիպվածին հարկուպատշաճ դեմքդիմակի մշտահաջող ընտրությամբ խույս է տալիս ամեն անգամ (հո մտացրիվ կլինի մի օր ) … … Երևակվում է կեղծտեսլականը, ցանկացյալը… բայց խիղճն անողոք վաշխառու է, գալիս է անտերն ու, չհարցնելով շահույթ, ստացվածք ու կայք, առնելիքն է ուզում, իսկ պարտապանների պակասություն, փառք աստծո, երբեք չի զգացել: Նրա կապանքների հեծությունից փրկող-ազատարար պատվիրանը, որի ամենաիսկական տեղը Գիր-գրոցի գլխագիրն է, բարբառում է. «Մա’րդ-մեղապարտ, անսա’ ժառանգական հիշողությամբ տեսակիդ փոխանցվող մայրենախոսության սրբությունը` ով գիտի բաբելոնյան որ խառնաշփոթում կորսված մարդկայներենդ, չաղարտելու պատգամը, անտրտունջ կրի’ր մարդկայնություն-խաչդ` իբրև բնության գերաշնորհ ընծա և մի` զլացիր խղճիդ խորանում գոնե երբեմն ( ինչպես սիրուհու՞ն են հիշում հարբելիս) խնկարկել ու ծունր իջնել ՄԻԱԿ-ի հանդեպ, որ թեպետև խաչողն ինքն է, բնավ ոչ խաչված, բայց աստվածություն է ճշմարիտ` եռաբախող երրորդությամբ… Իսկ առջևում դատ ու դատաստան կա (խաչվածի), նախքան այդ էլ` ամենաահեղ ինքնադատաստան (խաչողի)` զարկված հավքի երազհայտնությամբ…
Մեկնաբանել