«Սարդարապատ» շարժումն այսօր «Կենաց տուն» հասարակական կազմակերպության գրասենյակում քննարկում էր կազմակերպել, որի ընթացքում մտավորականները Հայաստանում օտարալեզու դպրոցներ բացելու վերաբերյալ ՀՀ կառավարության օրենսդրական նախաձեռնության դեմ գործուն քայլեր էին առաջարկում: Տարբերակները մի քանիսն էին. Ազգային Ժողովի դիմաց պիկետից մինչեւ գիտական աշխատություններով խնդրի հիմնավորում: Նախաձեռնող խումբը առաջարկները լսելուց հետո պատրաստվում է գործողությունների ծրագիր մշակել եւ հստակ քայլեր ձեռնարկել, որի մասին կտեղեկացվեն նաեւ լրատվամիջոցները: Նախ պետք է հանդիպեն ԱԺ Կրթության եւ գիտության հանձնաժողովի անդամների հետ, որպեսզի նրանց բացատրեն օտարալեզու դպրոցներ բացելու վտանգները: Եթե հանձնաժողովի անդամները դեմ քվեարկեն կառավարության ներկայացրած օրինագծին, այն չի մտնի Խորհրդարանի օրակարգ: Մտավորականները պատրաստվում են գործել 3 ուղղությամբ. գիտական քաղաքական իրավական Նախ պետք է գիտականորեն ապացուցել օտար լեզուներով կրթության բացասական ազդեցությունը, ապա ընդգծել եւ ուշադրություն հրավիրել խնդրի քաղաքական կողմի վրա: Մտավորականները կարծում են, որ Հայաստանի իշխանությունները մեր երկրում օտարալեզու դպրոցներ բացում են Ռուսաստանի, ԱՄՆ-ի եւ Եվրոպայի ճնշման տակ: Իսկ իրավաբանները պետք է փորձեն հիմնավորել, որ օտարալեզու դպրոցների բացումը հակասում է ՀՀ Սահմանադրությանը, ըստ որի` Հայաստանի պետական լեզուն հայերենն է, ինչպես նաեւ Ազգային անվտանգության հայեցակարգին: Ռեժիսոր Տիգրան Խզմալյանի կարծիքը զգալիորեն տարբերվում էր մյուսներից: Հեղափոխություն. սա է բոլոր խնդիրների լուծումը` ըստ Խզմալյանի: Իսկ գրող, հրապարակախոս Կարինե Խոդիկյանը ցանկանում է թարգմանական հեղափոխություն անել: Նրա խոսքով` պետությունը կարող է լուրջ միջոցներ ներդնել թարգմանության համակարգի զարգացման համար, որից հետո ցանկացած մասնագիտության գրականության հայերեն տարբերակը կունենանք: Առաջարկվող տարբերակներից մեկն էլ Կրթության եւ գիտության նախարար Արմեն Աշոտյանի հրաժարականի պահանջելն է, որը սակայն միանշանակ չընդունվեց, քանի որ, ինչպես մտավորականներն էին նշում. «Աշոտյանից հետո Գալուստ Սահակյանը կգա...»: