Լոռիում գյուղացիներից շատերն են կարծում, որ հողի մշակման հետ կապված դժվարությունները պայմանավորված են ոչ միայն եղանակով ու գյուղատնտեսական մթերքների գներով, այլև Կառավարության տնտեսական քաղաքականությամբ: Հենց այս առումով էլ նրանք կարևորում են վարչապետի հետ հանդիպումը: «Հազիվ էկել էր: Կգար, հլա մեր գյուղերի քարուքանդ եղած ճանապարհներով մի կերպ գոնե մի գյուղ կմտներ, անմշակ ու անտեր մեր հսկայական վարելահողերը կտեսներ, մի երկու գյուղացու հետ էլ կխոսեր, վարչապետ մարդ էր, կարող ա մեկի մատից էլ փուշ հաներ»,- դժգոհեց օձունցի Եզեկ Աղվանյանը: Օձունի 1300 հա վարելահողերից  այս տարի հազիվ 5 տոկոսն է մշակվում, նախորդ տարվա 10 տոկոսի դիմաց: Լոռին հանրապետության ամենամեծ մարզն է: Այստեղ 113 համայնքներից 103-ը գյուղական են: 2009թ.-ի մարզպետարանի տարեվերջի տվյալներով` մարզի 55,9 հազար հա վարելահողերից  շուրջ 6 հազար հա-ն աշնանացան է, իսկ 2009թ.-ի գարնան, ամռան ամիսներին մարզի 5 տարածաշրջանների 29 համայնքներում կարկտահարությունից գյուղացիների վնասները կազմել են 1 միլիարդ 440 մլն դրամ, որի դիմաց առ այսօր որևէ փոխհատուցում չի տրվել գյուղացիներին: «ՀՀ Պետբյուջեով 2009թ.-ին նախատեսված է մարզի Գոգարան, Մեծավան, Նորաշեն, Սարչապետ համայնքներում իրականացնել պետական աջակցության (սուբսիդավորման) ծրագրեր: Սակայն 2009թ.-ի գարնանացանի ժամանակ պահանջվող փաստաթղթերի փաթեթները կազմվեցին և ՀՀ գյուղնախարարություն ներկայացվեցին միայն Գոգարան համայնքի կողմից, մնացած 3 համայնքները չներկայացրեցին և գարնանացանից դուրս մնացին»,- 2009թ.-ի նոյեմբերին «Հետք»-ին տեղեկացրել էր Լոռու մարզպետարանի գյուղվարչության պետ Վ. Բունաթյանը: Սակայն Մեծավան, Նորաշեն, Սարչապետ գյուղերի ղեկավարները սուբսիդավորման համար անհրաժեշտ փաստաթղթերի փաթեթը գյուղնախարարությանը չեն ներկայացրել նաև աշնանացանի ժամանակ: Լոռու մարզպետ Արամ Քոչարյանը համայքի ղեկավարներից որեւ բան չի էլ պահանջել, փոխարենը իր տարեկան հաշվետվության մեջ հայտնել է. «ՀՀ կառավարության սուբսիդավորման ծրագրով  5 716 480 մլն դրամ սուբսիդավորում են ստացել Գոգարան համայնքի 185 ընտանիքներ` 163.33 հա հացահատիկի ցանքս կատարելու համար»: Մարզպետը դա համարում է ցուցանիշ: Մարզպետասրանի  հենց այս կարգի մոտեցումներն էլ առաջացնում է  գյուղացիների դժգոհությունը: «Լոռու մարզում վարելահողերի մշակության մակարդակը ցածր է, քանի որ արտադրվող բուսաբուծական մթերքները սեզոնային գերատադրության բնույթ են կրում և շուկայական էժան գինը չի փոխհատուցում կատարված աշխատանքները գոնե 100%-ով և գյուղացին գործնականում այնքան եկամուտ չի ստանում, որպեսզի իր ընտանիքի կարիքները հոգալուց հետո լիարժեք կարողա իր տնտեսության վերատադրությունն ապահովել»,-այս տարվա փետրվարի 9-ի մարզխորհրդի նիստում ասաց Վ. Բունաթյանը: Մարզի գյուղերում ծանր կացության մեջ են հայտնվել վարկառու գյուղացիները: Ճոճկանի գյուղապետ Սամվել Գիգոլյանը նշեց, որ «ԱԿԲԱ-Կրեդիտ-Ագրիկոլ» բանկից 2009թ.-ի վարկ վերցրած 26 գյուղացիներից 11-ը չեն կարողացել փակել իրենց վարկը, որի մարման ժամկետը եղել է 2010թ.-ի մարտի 10-ը: «Ժամկետանց վարկ ունեն Ռևազյան Ռոլանդը` 262 դոլար, Հախվերդյան Սուրենը` 277 դոլար, Սիրադեղյան Սաղաթելը` 643 դոլար և այլն: Գյուղացիները, եթե մի բանկից վարկ են վերցնում ու չեն կարողանում մարել, մի ուրիշ բանկից վարկ են վերցնում, նախկին վարկը մարում»,- ասաց գյուղապետը: Վարկի հարցում ճոճկանեցի Սեդրակ Անդրեասյանի բախտը չի բերել: Վարկով ձեռք բերած նրա 32 խոզերը օրեր առաջ ժանտախտից սատկել են: Անգամ այս պայմաններում շատ գյուղացիներ կարծում են, որ  կարող են այս ծանր վիճակից դուրս գալ, եթե պետությունը հնարավորություն տա: «Այսինքն` էս մեր մաքսային քաղաքականությունը, որ դրված ա, ոնց որ գյուղացու հենց հակառակ լինի դրված: Մի ժամանակ Վրաստանից գալիս էին մեր կարտոֆիլը մեծ բեռնատարներով դաշտում միանգամից բարձում, տանում էին: Գյուղացիներս  խնդիր չունեինք կարտոֆիլը ոչ պահեստավորելու, ոչ էլ վաճառելու: Փաստորեն, հիմա Բագրատաշենի մաքսատունը արգելում է նրանց մուտքը մեր գյուղեր: Կարտոֆիլի վրա դրին կանտրաբանդա, թե ինչ ա մի մարդ պետք ա էդ առևտուրն անի: Գյուղացին հողի հետ կկապվի, եթե կառավարության մենաշնորհային քաղաքականությունը վերանա: Ցորենը մեկը չներկրի, կարտոֆիլը մեկը չարտահանի: Կառավարությունը պետք է այնպիսի քաղաքականություն վարի, որ ներկրած ցորենը, մեր արտադրած ցորենից էժան չլինի: Մեր տեղական ցորենը վաճառվի: Այ այն ժամանակ, երբ գյուղացին կարողանա  այն մի քիչ թանկ վաճառել, կտենա, որ հողը մշակելը ձեռնտու ա, ինքն էլ հողը կվարի»,- կարծում է Եզեկ Աղվանյանը: