Տեսանյութեր
Լուսանկարներ
Հանդիպում Վիլ Ուրբանի քաղաքապետի գլխավորած պատվիրակության հետ
Ապրիլի 30-ին ՀՀ սփյուռքի նախարար Հրանուշ Հակոբյանն ընդունեց Ֆրանսիայի Վիլ Ուրբանի քաղաքապետ, Ազգային ժողովի պատգամավոր Ժան Պոլ Բրեդի գլխավորած պատվիրակությանը: Պատվիրակության կազմում էր նաև Վիլ Ուրբան քաղաքի ավագանու անդամ Մովսես Նիսանյանը:
Հրանուշ Հակոբյանը ողջունեց պատվիրակության ղեկավարի մտադրությունը` Արցախ այցելելու և ավելի մոտիկից ծանոթանալու միջազգային չափանիշների համաձայն ժողովրդավարության ճանապարհով զարգացող Արցախին:
Բարձր գնահատելով ֆրանսիական պետության ջանքերը Հայոց ցեղասպանությունն օրենքի մակարդակով ճանաչելու և դատապարտելու գործում` նախարարը հույս հայտնեց, որ 20-րդ դարի առաջին ցեղասպանության միջազգային ճանաչումը կբացառի ապագայում նման ոճրագործությունների իրագործումը:
Տեղեկացնելով սփյուռքի համայնքների ամբողջական պատմություն ստեղծելու մտադրության մասին` Հրանուշ Հակոբյանը քաղաքապետին առաջարկեց ստեղծել մի հանձնախումբ, որը կզբաղվի Վիլ Ուրբանի հայերի պատմությունն ուսումնասիրելու գործով:
Հանդիպման ընթացքում քննարկվեցին նաև մշակութային տարբեր միջոցառումներ կազմակերպելու, փոխանակման ծրագրեր իրականացնելու հարցեր:
Նախարարը տեղեկացրեց նաև Հայաստանում երկքաղաքացիության ձեռքբերման գործընթացում բյուրոկրատական խնդիրների հետ կապված նախկինում եղած բարդությունների վերացման մասին:
Այս մասին հայտնում է Սփյուռքի նախարարության մամուլի բաժինը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել