Դաստակերտը հացառատ քաղաք չէ
Քաղաք - Խոշոր բնակավայր, որի բնակիչներն զբաղվում են գլխավորապես արդյունաբերության եւ առեւտրի մեջ, ինչպես նաեւ սպասարկման, կառավարման, գիտության եւ մշակույթի ոլորտներում: Քաղաքը սովորաբար մշակութային եւ վարչական կենտրոն է շրջակա տարածքի համար: Բնակավայրը քաղաքի կարգին դասելու համար անհրաժեշտ է հաշվի առնել բնակչության թիվը եւ կատարելիք ֆունկցիաները:
Դաստակերտ - Քաղաքատիպ ավան Հայկական ՍՍՀ Սիսիանի շրջանում, Այրի լեռան ստորոտին, նույնանուն գետի ակունքի մոտ, շրջկենտրոնից 17 կմ հարավ: Դաստակերտի մոտ գտնվող պղնձամոլիբդենային հանքավայրի բազայի վրա ավանում գործում է Քաջարանի պղնձամոլիբդենային կոմբինատի մասնաճյուղը` իր հարստացուցիչ ֆաբրիկայով: (ՀՍՍՀ հանրագիտարան)
Եվ որտեղիգց հաց լինի, եթե վարելահող չկա: Մարզի եղած-չեղած հողերը վաղուց բաժանել են գյուղական համայնքներին: Դաստակերտին բաժին են հասել քաղաքի կարգավիճակն ու բյուջեի լրավճարները: Դաստակերտ քաղաքում 317 մարդ է ապրում: Մեծամասնությունը Ադրբեջանից է փախել: Այս 317 մարդիկ միասին վերցրած` ունեն 3 անձնական օգտագործման ավտոմեքենա: Բայց քաղաք է վերջապես, հանաք բան չկարծեք` անվտանգ երթեւեկության համար ճանապարհային երթեւեկության մոտ 10 նշան է տեղադրված: Ժամանակ առ ժամանակ բյուջեից փող է հատկացվում նոր նշաններ տեղադրելու համար: Վերջերս իշխանություններն առաջարկեցին լուսացույց տեղադրել: Քաղաքապետ Նաիրի Ֆիլոսյանը հրաժարվեց: Ասում է` այդ նշաններն ու լուսացույցը դնելու տեղ չկա... Քաղաքի բնակչության միայն 8%-ն է աշխատում` փոստում, քաղաքապետարանում, մեկ էլ` դպրոցում: Քաղաքում բուժօգնության կետ կա: Դպրոց է հաճախում 44 երեխա: Տարեկան ծնվում է 2-3 երեխա: Ծննդկաններին քաղաք Դաստակերտից տանում են Սիսիանի ծննդատուն: Մի քանի տարի առաջ կանանցից մեկին չհասցրին ծննդատուն տանել. երեխան ծնվեց կամրջին` Դաստակերտի մատույցներում:
Խորհրդային տարիներին (1968-ին) քաղաքում 4000 մարդ էր ապրում: 1975-ին կոմբինատի փակումից հետո Դաստակերտին հիշատակ մնաց միայն իր կարգավիճակը` քաղաք: Իրենց պատգամավորին` Ալեքսանդր Սարգսյանին, քաղաքի բնակիչները տեսել են միայն մեկ անգամ` 2008-ի նախընտրական հանդիպման ժամանակ: Դեռ պատգամավորության թեկնածու էր: Քաղաքի բնակիչներն իրենց «ընտրյալին» եւս մեկ անգամ տեսնելու սին պատրանքներ չունեն...
Գերման Ավագյան
Տես նաեւ՝ Դաստակերտը հացառատ քաղաք չէ
Մեկնաբանել