Ազգային անվտանգության խորհրդի քարտուղար Արթուր Բաղդասարյանն այսօր առավոտյան մասնակցում էր Աղետների ռիսկի նվազեցման ազգային պլատֆորմի քննարկմանը` նվիրված միջազգային համաժողովին: Ելույթ ունենալուց եւ բարձրաստիճան պաշտոնյաների խոսքը լսելուց հետո նա պատրաստվում էր հեռանալ համաժողովից, այդ ընթացքում փորձեցինք Արթուր Բաղդասարյանին հարց ուղղել Նուբարաշենի թունաքիմիկատների գերեզմանոցի վերաբերյալ, որն իրական աղետ կարող է դառնալ հանրապետության համար: «Ժամանակ չունեմ, մյուս անգամ»,- հարցը չլսած` պատասխանեց ԱԱԽ քարտուղարը եւ շատ արագ հեռացավ դահլիճից: Բաղդասարյանի թիկնապահներից մեկը բացատրեց, որ նա ուշանում է, սակայն չպարզաբանեց, թե ինչից: Արթուր Բաղդասարյանն այնքան էր շտապում, որ գրեթե վազելով դուրս եկավ «Անի» հյուրանոցից: Նրա այդ արարքը գրավեց հյուրանոցի ընդունարանում հավաքված զբոսաշրջիկների ուշադրությունը, որոնք միմյանց զարմացած հարցնում էին. «Who is that?» («Ո՞վ է նա»):