«Տպագիր մամուլն այստեղ ավելի ազատ է, քան էլեկտրոնային լրատվամիջոցները»
«Տպագիր մամուլը այստեղ ավելի ազատ է, քան էլեկտրոնային լրատվամիջոցները` հեռուստատեսությունը, ռադիոն: Չնայած ռադիոն էլ որոշակի ազատություն ունի, բայց ոչ այդքան մեծ: Շատերը այդ ազատությունը ճիշտ չեն օգտագործում և հասկանում են` ամենաթողություն»,- «Հետք»-ի հետ հարցազրույցում նշել է Չեխիայում լույս տեսնող «Օրեր» ամսագրի գլխավոր խմբագիր Հակոբ Ասատրյանը:
Նրա խոսքերով` Չեխիայում շատ ավելի ազատ են լրատվամիջոցները, հատկապես հեռուստատեսությունը շատ մեծ ազդեցություն ունի. «Տարբեր ալիքների, նաև մասնավոր հեռուստաընկերությունների առկայությունը թույլ է տալիս տարբեր թեմաների անդրադառնալ, նաև քննադատել իշխանություններին` սկսած նախագահից վերջացրած հասարակ չինովնիկով: Ամեն դեպքում ամեն մի լրատվամիջոց ներկայացնում է որևէ քաղաքական ուժի կամ բիզնեսի ներկայացուցչի, դա այդպես է և այստեղ, և այնտեղ»,- նշում է «Օրեր»-ի խմբագիրը` օրինակ բերելով Չեխիայում լույս տեսնող ամենազդեցիկ և իրար մրցակից երկու թերթերը, որոնք պատկանում են գերմանական մի ընկերության:
Հակոբ Ասատրյանը չի հասցնում կարդալ հայկական թերթերը, բայց իր խոսքերով` եթե որևէ մեկի սեղանին տեսնում է, վերցնում է և թերթում: Հայկական լրագրողական դաշտից նա բազմաթիվ ընկերներ ունի, բայց չնշեց, թե այստեղ հատկապես ում է հավանում որպես լրագրող` ասելով, որ «նրանք բոլորը գիտեն իմ կարծիքը իրենց մասին»:
Հակոբ Ասատրյանը տեղափոխվել է Չեխիա, քանի որ կնոջը` Աննա Կարապետյանին աշխատանք էին առաջարկել «Ազատություն» ռադիոկայանում: Ինքն էլ որոշ ժամանակ աշխատել է որպես այդ ռադիոկայանի ռուսական ծառայության թղթակից.
«Խիստ կապվածություն չկա Չեխիայի հետ, կվերադառնամ, եթե աշխատանքի խնդիրը լուծվի»: Ասատրյանը հաճախակի է այցելում Հայաստան, այդ պատճառով էլ մեծ տարբերություններ այստեղ չի զգում. «Այստեղ ինձ չուրախացրեց անկազմակերպվածությունը, կոռուպցիայի առկայությունը: Մի տեսակ թափթփվածություն է զգացվում, տեղեր կան, որ գեղեցկացել է, տեղեր կան, որ փչացրել են, ճարտարապետության մասին չեմ ուզում խոսել, ամեն դեպքում ինչ-որ չափանիշներ կան, որ չպիտի խախտվեն»:
«Հայաստանը ինչպե՞ս կցանկանայիք տեսնել» հարցին հարցազրույցի կազմակերպիչ և մասնակից «Ազգ»-ի գլխավոր խմբագիր Հակոբ Ավետիքյանը միջամտեց` պատասխանելով` «Ինչպես Հ1-ն է ցույց տալիս»:
Չեխիայի հայ համայնքը նոր է, ձևավորվել է վերջին 10-15 տարիների ընթացքում: Այդ համայնքի ներկայացուցիչ Հակոբ Ասատրյանը նշեց, որ համայնքի կարևոր խնդիրներից մեկը կազմակերպվածությունն է. «Ճիշտ է, կա շաբաթօրյա դպրոց, կա հոգևորական, բայց համայնքը չունի համայնքային կենտրոն, որտեղ մարդիկ գան-գնան, հավաքվեն, այդ հարցը արդեն քննարկվում է»:
Երեկ Հակոբ Ասատրյանը վերադարձավ Չեխիա:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել