Տեսանյութեր
Լուսանկարներ
«Բուլղարիայի եւ Հայաստանի միջեւ կապերը նույնքան հինավուրց են, որքան երկու ժողովուրդները»
Բուլղարիայի Մշակույթի նախարարության «Սրեդեց» սրահում տեղի է ունեցել Հայաստանին նվիրված «Եվրոպա 2001» ամսագրի ապրիլյան համարի շնորհանդեսը, որը հրատարակվել է Բուլղարիայում Հայաստանի դեսպանության նախաձեռնությամբ` «Հայկական մշակույթի տարի Բուլղարիայում» խորագրով փառատոնի շրջանակներում:
Ինչպես տեղեկացնում է ԱԳ նախարարության մամլո ծառայությունը, շնորհանդեսին ելույթներով հանդես են եկել Բուլղարիայում Հայաստանի դեսպան Սերգեյ Մանասարյանը, Բուլղարիայի մշակույթի փոխնախարար Թոդոր Չոբանովը եւ «Եվրոպա 2001» ամսագրի գլխավոր խմբագիր տիկին Գենչեւան:
Դեսպան Մանասարյանը հատուկ շնորհակալություն է հայտնել բոլոր այն գերատեսչություններին եւ անհատներին, որոնց աջակցությամբ եւ անմիջական մասնակցությամբ հնարավոր է եղել առաջին անգամ բուլղարերենով հրատարակել ամբողջովին Հայաստանին նվիրված ամսագիր, որտեղ ընթերցողին հնարավորություն է ընձեռնվում ծանոթանալ ինչպես հայ ժողովրդի պատմական անցյալին, մշակութային ժառանգության, կրոնին ավանդույթներին, այնպես էլ նորանկախ Հայաստանի Հանրապետության արտաքին, ներքին եւ տնտեսական քաղաքականության գերակա ուղղություններին եւ խնդիրներին:
Բուլղարիայի մշակույթի փոխնախարարը իր ելույթում եւս, անդրադառնալով հայ- բուլղարական դարավոր բարեկամությանը, ավելացրել է, որ Բուլղարիայի եւ Հայաստանի միջեւ կապերը նույնքան հինավուրց են, որքան երկու ժողովուրդները եւ բուլղարահայ համայնքը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել