«Է.Պ.Գ.» Էջմիածնի պահածոների գործարանը երկակի խաղ է խաղում գյուղացիների հետ: Գյուղատնտեսական ապրանքը մթերում է, գումարը տրամադրում օրեր անց, եւ հենց այդ պահին էլ գյուղացին հայտնվում անելանելի դրության մեջ:

Արմավիրի մարզի մի շարք գյուղացիներ, այդ թվում` համայնքի ղեկավարներ, դժգոհում են, որ «Է.Պ.Գ.» գործարանը իրենց ապրանքի ամբողջ գինը չի տալիս: Կանխիկ վճարում է միայն գումարի մի մասը, իսկ որոշակի գումարի դիմաց տրամադրում  է «AG» խանութների ցանցում գնումներ անելու քարտեր: Դժգոհողները խնդրեցին իրենց անունները չհրապարակել, քանի որ գործարանն իրենց դեռ պարտք է, եւ շատ հնարավոր է, որ իրենց անունները հոդվածում տեսնելուց հետո դրանք հայտնվեն գործարանի «սեւ ցուցակում», կամ լավագույն դեպքում` պարտքն ամբողջությամբ մարի քարտերով:

Գործարանի տնօրեն Հարություն Աղումյանը «Հետքի» հետ զրույցում բավականին ինքնավստահ էր, եւ չէր էլ թաքցնում, որ գյուղացիներին վճարում է քարտերով, որ գնան պարտադրված գնումներ կատարեն:

Ներկայացնում ենք «Հետքի» եւ Հարություն Աղումյանի հեռախոսազրույցը:

Գյուղացիները դժգոհում են, որ իրենք Ձեր գործարանում ապրանք են հանձնում, ու Դուք նրանց վճարում եք «AG» խանութների ապրանքային քարտերով: Դա այդպե՞ս է:

Դա ի՞նչ է, բողոք ա՞:

Իհարկե, քանի որ գյուղացիներն ասում են, որ այդ քարտերը չեն օգտագործում:

Իսկ դուք ի՞նչ արեցիք: Ստուգեցի՞ք, որ այդ քարտերն օգտագործվում են ու նորմալ բան են:

Իսկ գյուղացին Ձեր հետ պայմանավորվե՞լ է, որ պիտի քարտ ստանա:

Հարցաքննությու՞ն եք վարում, թե՞ ինչ եք վարում:

Ես ընդամենը հարցնում եմ:

Նույն մեր համակարգն է դա, մեր համակարգինն է: Փողը տվողն էլ ենք մենք, քարտը տվողն էլ ենք մենք: Մեր խանութներում այդ քարտով առանց ժամկետի, առանց որեւէ բանի… կա տնտեսական ապրանքներ եւ պարենային ապրանքներ, գյուղացիներն էլ մեծ սիրով վերցնում են: Լավ կլիներ այդ մարդկանց անուններն ասեիք, ոչ թե պախկվոցի խաղաք, գյուղացին իմ դիմացն ասեր, որ ես ասեի` սուտ ա ասում, թե ճիշտ ա ասում:

Բայց իրենք  Ձեր հետ չեն պայմանավորվել  չէ՞, որ գումարի դիմաց պիտի քարտ ստանան:

Բա, եթե չեն պայմանավորվել, ինչի՞ են եկել ինձ մոտ:

Իրենք եկել են ապրանք հանձնելու:

Որտեղ պայմանավորվել են, թող տանեն ընդեղ հանձնեն, որտեղ որ պայմանավորվածություն ունեն:

Այսինքն այդ ամենն օրինաչա՞փ եք համարում:

Այո:

«AG» խանութների ցանցը Ձե՞րն է:

Այո: