Լոռու մարզի Ստեփանավան քաղաքից ոչ հեռու գտնվող Արմանիս գյուղում 97-ամյա մի կին՝ Սոֆյա Սարգսյանը, ատամ է հանել: Ֆոտոլրագրող Գագիկ Շամշյանի հետ զրույցում տատիկն ասել է, որ ոչ թե մեկ, այլ վեց նոր ատամ ունի:

97-ամյա Սոֆյա տատիկը ֆոտոլրագրողին պատմել է, որ ունի 5 երեխա, 6 թոռ և 7 ծոռ, սակայն այժմ մենակ է ապրում: Տատիկին խնամում են հարևանները:

Նա կարոտով է հիշել խորհրդային տարիները, երբ ինքը կարողանում էր կով կթել և գյուղատնտեսական այլ գործերով զբաղվել: Տատիկը դժգոհել է իր սոցիալական վիճակից` ասելով, որ ստանում է 30 հազար դրամ թոշակ և չգիտի, թե ինչի վրա ծախսի այդ գումարը:

Տատիկը բողոքել է պետության անուշադրությունից` նշելով, որ իրեն հիշում են միայն ընտրությունների օրը. գալիս ու իրեն տեղափոխում են ընտրատեղամաս` քվեարկելու:

Լուսանկարները՝ Գագիկ Շամշյանի