Ուսանողական այգում միաժամանակ վերակառուցվող երկու սրճարանների մասին մեր հրապարակած հոդվածից հետո «Հետք» զանգահարեց Ռազմական ոստիկանության պետ Վովա Գասպարյանի տեղակալ Գագիկ Զոհրաբյանը եւ վստահեցրեց, որ Գասպարյանը որեւէ կապ չունի սրճարանների հետ: «Ես Ձեզ Գասպարյանի խոսքերն եմ փոխանցում` եթե այդ սրճարանը իմն է, ուրեմն ձեզ եմ նվիրում այն»,- ասաց ՌՈ պետի տեղակալը: Նշենք, որ նախքան հոդվածը հրապարակելը մենք փորձել էինք կապվել Վովա Գասպարյանի հետ, սակայն Ռազմական ոստիկանության աշխատակիցները մեզ չտվեցին նրա հեռախոսահամարը` նշելով, թե նա հեռախոսով հարցերի չի պատասխանում: Հիշեցնենք, որ նախկին «Յոլկի-Պալկի» սրճարանը վերակառուցող «Արմեն» ՍՊԸ-ի տնօրենը թեեւ պատասխանել էր «Հետքի» հարցերին, այնուամենայնիվ, համառորեն չցանկացավ ասել իր անունն ու ազգանունը: Իսկ մամուլում լուրեր հրապարակվեցին, թե սրճարանը վերակառուցողը Վովա Գասպարյանն է, ինչն էլ այսօր հերքեց վերջինիս տեղակալը: Թեմայի վերաբերյալ մանրամասները կներկայացնենք «Հետք» շաբաթաթերթի առաջիկա համարում: