Բաց նամակ ՀՀ բնապահպանության նախարար պրն Արամ Հարությունյանին «Դինո գոլդ մայնինգ քամփնի» ՓԲ ընկերությունը ցանկանում է Շահումյանի ոսկու բազմամետաղային հանքավայրի բաց շահագործման ծրագիր իրականացնել: Իր ապագա ծրագրերի մասին ընկերությունը մամուլով տեղեկացրել է տեղի բնակչությանը: Մեր կարծիքով Շահումյանի հանքավայրի բաց շահագործումը բացասական հետևանքներ կունենա տարածաշրջանի էկոլոգիական վիճակի վրա: Կապանի էկոլոգիական վիճակը արդեն իսկ վատ է: Դրա մասին են վկայում ՀՀ ԳԱԱ Էկոլոգոնոոսֆերային հետազոտությունների կենտրոնի գիտական հետազոտությունները: Ծանր մետաղներով և թունավոր տարրերով աղտոտված են ոչ միայն Կապան համայնքի վարչական տարածքը, այլև այն շրջապատող համայնքները: Նշենք, որ փոշու, գազերի, ճառագայթման, աղտոտված ջրի ու հողի, թափոնների և պոչամբարների տեսքով էկոլոգիական բեռնվածությունը նախևառաջ պայմանավորված է երկու խոշոր լեռնահանքարդյունաբերական ձեռնարկության գործունեությամբ` Զանգեզուրի պղնձամոլիբդենային կոմբինատի, որը բաց եղանակով շահագործում է Քաջարանի հանքավայրը, և «Դինո գոլդ մայնինգ քամփնիի», որը փակ եղանակով շահագործում է Շահումյանի հանքավայրը: Մեր կարծիքով` եթե Շահումյանի հանքավայրը շահագործվի բաց եղանակով, ապա մենք 40 հազար բնակչությամբ քաղաքում կունենանք բաց հանք, որի հասցեն է` քաղաք Կապան, Շահումյան թաղամաս: Մենք կարծում ենք, որ եթե խոսվում է մարդկանց առողջության և կյանքի մասին, ընկերությունը պետք է շատ ծանրակշիռ ապացույցներ ներկայացնի, որ իրեն անհրաժեշտ է անցնել բաց եղանակով հանքանյութի հանքահանման: Եթե մի ընկերություն երկար տարիների ընթացքում Շահումյանի հանքավայրը նախագծային պայմանների խախտումներով է շահագործել, և արդյունքում առաջացել են ստորգետնյա դատարկ տարածություններ, ինչի մասին ասվում է անկախ փորձագետների գնահատականներում, որոնց տիրապետում է ընկերությունը («Դինո գոլդ մայնինգ քամփնի» ընկերության պատվերով «Georisk» ընկերության հետազոտություններն ու ընկերության նախկին գլխավոր ինժեներ Սամվել Գասպարյանի եզրակացությունները), ապա ինչպե՞ս կարող է բաց եղանակով շահագործման ժամանակ բացառել ռիսկերը` ուղղված մարդկանց առողջությանը, կյանքին և էկոլոգիական անվտանգությանը: Քանի որ Հայաստանի Հանրապետությունը որդեգրել է եվրոպական ընտանիքին անդամակցելու քաղաքականությունը, մենք ուզում ենք հղում անել եվրոպական փորձին, երբ բոլոր նմանատիպ որոշումներն ընդունվում են լայն հասարական քննարկման արդյունքում և դատական համակարգի միջոցով: Ապրիլի 16-ին Բուլղարիայում դատական համակարգի միջոցով լուծում ստացավ «Դինո գոլդ մայնինգ քամփնիի» սեփականատեր, կանադական «Դանդի փռեշս մետալս» ընկերության հարստացման ֆաբրիկայի կառուցման հարցը: Ձեզ ենք ներկայացնում «Ռոյթերս» լրատվական գործակալության տարածած, Բուլղարիայի Գերագույն վարչական դատարանի վերջնական որոշումը` կապված Շրջակա միջավայրի ազդեցության գնահատականի (ՇՄԱԳ) լուծման հետ, ըստ որի` Չելոպեչի հանքում մետաղների հարստացման ֆաբրիկայի կառուցման մասին որոշումը չեղյալ համարվեց: Դատարանի այս որոշումը հրապարակվեց 2010 թ. ապրիլի 15-ին, այն հաստատեց երեք անդամից բաղկացած կոլեգիայի նախկին (2009 թ. նոյեմբերի 4) որոշումը: Տվյալ որոշումը չեղյալ համարեց ՇՄԱԳ-ի լուծումը` հրապարակված Բնապահպանության նախարարության կողմից, որի համար մեջբերում է հետևյալ պատճառները. 1. ՇՄԱԳ-ի հասարակական լսումների և ՇՄԱԳ-ի լուծման հրապարակման ամսաթվի միջև 2,5 տարվա ուշացումը, 2. այն, որ Բնապահպանության նախարարությունը ճշգրտորեն չի սահմանել ազդեցության ենթարկված համայնքները, 3.առաջարկվող ավտոկլավ/ճնշման օքսիդացման տեխնոլոգիան չէր համարվում արդյունաբերական մասշտաբի աշխատանքի համար առկա լավագույն մեթոդը նույն կոնցենտրատի հետ, ինչպիսինն է Չելոպեչ հանքինը: Պարոն նախարար, խնդրում ենք Ձեզ տեղեկատվություն տալ, թե ի՞նչ է ձեռնարկում ՀՀ բնապահպանության նախարարությունը վերոհիշյալ խնդիրների վերաբերյալ, և արդյոք ցանկանո՞ւմ եք որդեգրել եվրոպական փորձը: Չէ՞ որ Հայաստանի Հանրապետությունը որդեգրել է եվրոպական ընտանիքին անդամակցելու քաղաքականությունը: «Էկոլոգիական անվտանգության ապահովման և ժողովրդավարության զարգացման» հասարակական հազմակերպություն 14. 05. 2010թ.