«Ես չեմ պատկերացնում, թե էս երկիրն էս ինչ անարդար երկիր է: 20 տարի գործող գյուղապետին ոչ մեկ ոչինչ չի արել, դեմը դնող չի եղել: Անարդարություններ արել է` հերիք չի, հիմա էլ բոլոր ջահելներին, երիտասարդ տղաներին գիշեր-ցերեկ հանգիստ չեն տալիս, զանգում են անընդհատ, թե քեզ բռնել կտանք, բերդ կտանենք, սպանել կտանք: Փող են բաժանում, ժողովրդին խաբում, դիմում գրել են տալիս: Մարդկանց էլ խաբում են, թե քվեախցիկների մոտ կամերաներ են դրվելու, ու տեսնելու են, թե ով է փող վերցրել ու չի ընտրել»,- օրեր առաջ «Հետքին» ասում էր Արարատի մարզի Հայանիստ գյուղի համայնքապետի թեկնածու Բալաբեկ Սարկիսյանը եւ մեղադրում գործող գյուղապետ Գուրգեն Մարտիրոսյանին: Այսօր` ընտրությունների օրը, թեկնածուն ամբողջությամբ փոխվել էր եւ ավելի զուսպ էր արտահայտվում միակ մրցակցի մասին: «Ոչ մի բան էլ չկա, լրիվ նորմալ է ընթանում: Ինչ եղել է արդեն անցել է»,- այսօր ասաց Բալաբեկ Սարկիսյանը: Երբ զրուցում էինք նրա հետ, մի երիտասարդ եկավ եւ գրեթե քաշելով տարավ թեկնածուին` ասելով, թե «բոլոր հարցերին կպատասխանես ընտրություններից հետո: Հիմա ավելորդ բաներ էս ասելու»: Այդ պահին Բ. Սարկիսյանից հետաքրքրվում էինք, թե ով է նրան աջակցում, որ ավելի ամուր դիրքերից է խոսում: «Ինձ ոչ մի պաշտոնյա էլ չի աջակցում»,- ասաց ու հեռացավ: Շրջանառվող լուրերի համաձայն, գործող գյուղապետի թեկնածությունը պաշտպանում են ԱԺ նախագահ Հովիկ Աբրահամյանն ու ՀՀ ոստիկանապետ Ալիկ Սարգսյանը, իսկ Բ. Սարգսյանին «հաղթելու խոստում» տվել է Մասիսի տարածքից մեծամասնականով պատգամավոր ընտրված ԲՀԿ անդամ Տիգրան Ստեփանյանը: Հայանիստում խոսում էին, որ այս ընտրությունները, ոչ թե գյուղապետի ընտրություններ են, այլ երկու իշխանական թեւերի` ՀՀԿ-ի ու ԲՀԿ-ի: Միայն ընտրատեղամասի հարեւանությամբ, փողոցի երկու կողմերի երկայնքով շարված արտասահմանյան մակնիշի թանկարժեք մեքենաների առկայությունն արդեն հուշում էր, թե ինչ կարգի մարդիկ են կանգնած գյուղապետի թեկնածուների կողքին: Նույնիսկ հասարակական կարգը պահպանող ոստիկաններն էին բաժանվել երկու մասի: Նրանց մի մասը լավ հարաբերությունների մեջ էր մի թեկնածու հետ, մնացածը`մյուսի: Ինչքան էլ երկու կողմերը փորձում էին ձեւական հանգստություն պահպանել, այնուամենայնիվ գյուղում թեկնածուների կողմնակիցները լարված էին միմյանց նկատմամբ: Առավոտյան նույնիսկ փոքր բախում է եղել նրանց միջեւ: Ընտրատեղամասը գտնվում էր գյուղի դպրոցում, թեեւ տարածքը լայն էր, բայց մոտ 50 մարդ էր հավաքվում տարածքում, իսկ քվեախցերի մոտ միանգամից հավաքվում էին 3-4 ընտրող: Կարեւորելով նույնիսկ մեկ ընտրողի ձայնը, երկու թեկնածուների կողմնակիցներն էլ ավտոմեքենաներով էին մարդկանց բերում տեղամաս: Ընտրության էին բերում նույնիսկ ոտքի վրա հազիվ կանգնող տատ-պապերին: