Այս պահին արդեն ամփոփվում են Արարատի մարզի մի քանի համայնքներում կայացած համայնքապետի եւ ավագանու անդամի ընտրությունների արդյունքները: Հայանիստ գյուղում գյուղապետ է ընտրվել անկուսակցական Բալաբեկ Սարկիսյանը: Նա հավաքել է 565 ձայն, իսկ գործող գյուղապետ, ՀՀԿ անդամ Գուրգեն Մարտիրոսյանը` 439 ձայն: Արդեն տեղեկացրել էինք, որ այստեղ պայքարը գնում էր մի կողմից ԱԺ նախագահ Հովիկ Աբրահամյանի եւ Ոստիկանապետ Ալիկ Սարգսյանի աջակցությունը վայելող Գ. Մարտիրոսյանի եւ ԲՀԿ-ից ընտրված պատգամավոր Տիգրան Ստեփանյանի աջակցությունը վայելող Բ. Սարկիսյանի միջեւ: Մինչ այսօր իրեն անկուսակցական համարող Բ. Սարկիսյանը ընդդիմադիրի դիրքերից էր հանդես գալիս եւ մեղադրանքներ էր հնչեցնում արդեն նախկին գյուղապետի հասցեին, սակայն ընտրության օրը միանգամից փոխվեց: Ինչպես գյուղացիներն էին ասում, իրականում ընտրապայքարը գնում էր ՀՀԿ-ի եւ ԲՀԿ-ի միջեւ: Փաստորեն Հայանիստում «իշխանափոխություն» արեց ԲՀԿ-ն եւ գյուղապետի պաշտոնից զրկեց գրեթե 20 տարվա համայնքային աշխատողի ստաժ ունեցող գյուղապետին: Սիփանիկ գյուղում 9 ձայնի առավելությամբ գյուղապետ վերընտրվեց Հայկ Բադալյանը: Նա ստացել է 126 ձայն, 117 ձայն է հավաքել նրա մրցակից Արայիկ Մանուկյանը: Վերջինս «Հետքի» հետ զրույցում ասաց, որ չի պատրաստվում բողոքարկել ընտրությունների արդյունքները եւ իրեն հաղթանակած է համարում: «Պարտադիր չէ, որ գյուղապետի պաշտոնը ստանայի, նոր հաղթեի, գործող գյուղապետի հետ գրեթե հավասար ձայներ հավաքելն արդեն իսկ հաղթանակ եմ համարում»,- ավելացրեց Ա. Մանուկյանը: Նա ասաց, որ ընտրությունների վերջին ժամերին վերլուծել է, թե ինչպես է անցել ողջ գործընթացն իրենց համայնքում եւ եզրակացրել է, որ գյուղապետի հաղթանակը «երեւի պայմանավորված էր բաժանված ընտրակաշառքով»: