Բայց տուժում են ստորին օղակի աշխատողները Արագածոտնի մարզի Շամիրամ գյուղի ավագանու նիստին, որը տեղի էր ունեցել ապրիլի 28-ին, կայացվել են մի շարք կարևոր որոշումներ, որոնք օրակարգում տեղ են գտել ոչ թե հատուկ հարցով, այլ ներառվել են «ընթացիկ հարցերի» մեջ: Ասենք, «ընթացիկ հարց» է դիտվել համայնքի ղեկավարի աշխատակազմի հաստիքացուցակի հաստատումը: Նշենք, որ Շամիրամն ունի մոտ 1.600 բնակչություն, և ըստ «Տեղական ինքնակառավարման մասին» օրենքի` համայնքի ղեկավարի աշխատավարձը պետք է սահմանվի ԱԺ պատգամավորի աշխատավարձի մոտ 60 տոկոսի չափով, այս դեպքում` 180.000 դրամ: Բայց գյուղապետ Մրազ Բրոյանը, «ելնելով համայնքի բնակչության թվաքանակից և նրանց սպասարկելու հնարավորություններից», ավագանուն առաջարկել է համայնքի ղեկավարի աշխատավարձը սահմանել 177.000 դրամ: Փոխարենը գյուղում որոշել է պահել 0.60 դրույքով գրադարանավար` 21.000 դրամ աշխատավարձով, ինչպես նաև 0.40 դրույքաչափով հավաքարար` 12.500 դրամ աշխատավարձով: Փաստորեն, գրադարանավարն ու հավաքարարը չեն ստանում նույնիսկ նվազագույն աշխատավարձ, իսկ գյուղապետը իր համար սահմանել է օրենքով նախատեսված առավելագույն աշխատավարձից ընդամենը 3.000 դրամով պակաս աշխատավարձ: Գյուղապետի այս առաջարկը գյուղի ավագանին հաստատել է միաձայն: Մրազ Բրոյանն իր աշխատավարձը ևս «անձեռնմխելի» է թողել, երբ ավագանու նիստում առաջարկություն է ներկայացրել աշխատակազմում ավելացնել մեկ այլ նոր` «հսկիչ-կազմակերպչի» հաստիքը: «Հսկիչ-կազմակերպիչը» պետք է զբաղվի գերեզմանոցի տարածքի, փողոցների, հուշարձանների տարածքների մաքրության և այլ հարցերով: Այդ աշխատանքների համար սահմանվել է 45.000 դրամ աշխատավարձ: Նոր հաստիք բացելու համար 15.000-ական դրամով կրճատվել են գյուղապետի տեղակալի, հաշվապահի և գանձողի աշխատավարձերը: Այժմ գյուղապետի տեղակալը ստանում է 100.000, իսկ աշխատակազմի քարտուղարը` 105.000 դրամ աշխատավարձ: Քանի որ Շամիրամի գյուղապետի հետ հեռախոսակապ հաստատել մեզ չհաջողվեց, դիմեցինք Արագածոտնի մարզպետարանի ՏԻՄ վարչության պետ Սիրասնիկ Հովսեփյանին: Նա ասաց, որ մի շարք համայնքներում ֆինանսական խնդիրներ կան, և այդ պատճառով են հավաքարարի ու գրադարանավարի աշխատավարձերը կրճատվել: «Քանի որ այդ գյուղերի դպրոցներում կան գրադարաններ, առաջարկել ենք համայնքի գրադարանը միացնեն դպրոցի գրադարանին և լուծել այդ խնդիրը»,- ասաց Սիրասնիկ Հովսեփյանը: Մինչ գյուղապետ Մրազ Բրոյանը կորոշի կարգավորել այս հարցը, գյուղի գրադարանավարն ու հավաքարարը կշարունակեն ստանալ օրենքով սահմանված նվազագույն աշխատավարձից էլ պակաս աշխատավարձ: «Ես հասկանում եմ ձեր մտահոգությունը, դուք իրավացի եք, բայց այս դեպքում խնդիրը բարոյական հարթության մեջ է, և գյուղապետը ինքը պետք է մտածեր դրա մասին»,- ավելացրեց Սիրասնիկ Հովսեփյանը: