Այսօր ՀՀ վարչական դատարանը քննեց «Ուսման իրավունք» նախաձեռնող խմբի անդամներ Սոս Ավետիսյանի և Դանիել Իոաննիսյանի հայցով գործը և մերժեց հայցապահանջները: Երևանի քաղաքապետարանն արգելել էր «Ուսման իրավունք» նախաձեռնող խմբի անդամների` մայիսի 19-ին Շառլ Ազնավուրի հրապարակում հանրահավաք և մայիսի 20-ին ԵՊՀ-ից դեպի ՀՀ կառավարություն երթ անցկացնելու մասին իրազեկումները, և ուսանողները երեկ դիմել էին դատարան: Հանրահավաքի անցկացումն արգելվեց` հիմնվելով «Ժողովներ, հանրահավաքներ, երթեր և ցույցեր անցկացնելու մասին» ՀՀ օրենքի 9-րդ հոդվածի 5-րդ մասի վրա, որում ասվում է, որ մշակութային և մարզական համալիրների տարածքներում հրապարակային միջոցառումները լիազոր մարմնի կողմից կարող են սահմանափակվել` դրանցում անցկացվող միջոցառման բնականոն ընթացքը չխաթարելու նպատակով: Սակայն «Ուսման Իրավունք» նախաձեռնող խմբի անդամները նշում են, որ Ազնավուրի անվան հրապարակը մշակույթային կամ մարզական համալի չէ, և այստեղ բազմիցս հանրահավաքներ են կայացել: Վարչական դատարանի որոշման մեջ ասվում է, որ օրենքի «մշակութային և մարզական համալիրների տարածքներ» եզրույթը վերաբերում է ոչ թե կոնկրետ համալիրում ներառված տարածքին, այլ համալիրին հարող տարածքին, իսկ Ազնավուրի հրապարակը հարում է «Մոսկվա» կինոթատրոնին: Սակայն «Ուսման Իրավունք» նախաձեռնող խմբի անդամները նշում են, որ օրենքի այդ դրույթում բացակայում է «հարող» բառը, ինչը հստակ ենթադրում է, որ օրենքում խոսքը օրենքում խոսքը հենց մշակույթային կամ մարզական համալիրի հստակ գույքային տարածքի մասին է: Երթի անցկացումն արգելվեց` հիմնվելով այն բանի վրա, որ դրա տևողությունն այնքան մեծ է, որ կխաթարի փողոցներում երթևեկության բնականոն ընթացքը` չնայած իրազեկման մեջ նշված էր, որ երթն ընթանալու է մայթերով: Դատարանը չպարզաբանեց, թե մայթերով շարժվող մի քանի հարյուր ուսանողները ինչպես կարող են խաթարել երթևեկությանը: Բացի դրանից` դատարանի համար հայցը բավարարելու հիմք չեղավ նաև այն հանգամանքը, որ կազմակերպիչներին չէին առաջարկվել երթի անցկացման այլ օրեր և այլ ժամեր կամ միջոցառման ձևին վերաբերող այլ պայմաններ, ինչը պահանջում է նշյալ օրենքի 13-րդ հոդվածի 4-րդ մասը: ««Ուսման իրավունք» ուսանողական նախաձեռնող խմբի անդամներս խիստ մտահոգված ենք ՀՀ պետական մարմինների ուսանողական նախաձեռնություններին սվիններով դիմավորելու փաստով, որը հաճախ զուգորդվում է ՀՀ օրենսդրության կիպիտ ոտնահարումներով»,- ասվում է ուսանողական նախաձեռնող խմբի այսօր տարածած մամուլի հաղորդագրության մեջ: