Նախօրեին, Երեւանի «1-02» ծառայությունից ստացված տեղեկության համաձայն` ժամը 17.20-ին անձը չպարզված քաղաքացուց ահազանգ է ստացվել, որ Երեւանի Տիգրան Մեծի պողոտա 33 հասցեում գտնվող «Տաշիր» առեւտրի կենտրոնի 2-րդ հարկում ռումբ է տեղադրված: Դեպքի մասին տեղյակ են պահվել ՀՀ ԱԱԾ, ՊՆ եւ «1-03» ծառայության հերթապահները: Ժամը 17.36-ին դեպքի վայր են մեկնել` մեկ մարտական հաշվարկ, փրկարարական ուժերի վարչության հատուկ փրկարարական ջոկատը, հրդեհաշիջման կազմակերպման բաժնի եւ ճգնաժամային կառավարման կենտրոնի օպերատիվ խմբերը: Մինչ ժամը 18.20-ը իրականացվել է առեւտրի կենտրոնում գտնվող քաղաքացիների տարահանում: Դեպքի վայրում է գտնվել ՀՀ ԱԻ նախարարի առաջին տեղակալ, Հայաստանի փրկարար ծառայության տնօրեն Է. Բարսեղյանը: ՀՀ ոստիկանության աշխատակիցների կողմից մինչեւ ժամը 19.25-ը իրականացված որոնողական աշխատանքների արդյունքում ռումբ չի հայտնաբերվել: Այս մասին տեղեկացնում է Հայաստանի փրկարար ծառայությունը: