Արտաքին գործերի նախարար  Էդվարդ Նալբանդյանն այսօր հանդիպել է աշխատանքային այցով Հայաստան ժամանած Արգենտինայի արտաքին հարաբերությունների, առեւտրի եւ պաշտամունքի նախարար Խորխե Տայանային (Jorge Taiana): ԱԳՆ մամլո ծառայության փոխանցմամբ` նախարար Նալբանդյանը արձանագրել է, որ հայ-արգենտինական հարաբերությունները նոր փուլ են թեւակոխում, դա է վկայում  նախարար Խորխե Տայանայի մասնակցությամբ Հայաստանում Արգենտինայի դեսպանատան բացումը: Է. Նալբանդյանը շնորհավորել է իր արգենտինացի գործընկերոջը Արգենտինայի անկախության 200-ամյակի, ինչպես նաեւ Երեւանում դեսպանության բացման կապակցությամբ` նշելով, որ Հայաստանը եւս իր առաջին դեսպանությունը Հարավային Ամերիկայում բացել է Արգենտինայում: «Չնայած աշխարհագրական հեռավորությանը, մեր ժողովուրդներն առանձնահատուկ ջերմությամբ եւ համակրանքով են վերաբերվում միմյանց, ինչը պարտավորեցնում է գործուն քայլեր ձեռնարկել Հայաստանի եւ Արգենտինայի միջեւ հարաբերություններն առավել ամրապնդելու ու ընդլայնելու համար, խորացնելու համագործակցությունը միջազգային ասպարեզում» - ասել է Է. Նալբանդյանը: Հայաստանի արտաքին քաղաքական գերատեսչության ղեկավարը բարձր է գնահատել արգենտինահայ համայնքի դերակարատությունը երկկողմ հարաբերությունների ձեւավորման գործում: Է. Նալբանդյանը համոզմունք է հայտնել, որ Խորխե Տայանայի առաջին այցը Հայաստան եւս նոր լիցք կհաղորդի երկու բարեկամ երկրների արտաքին գերատեսչությունների գործակցության խորացմանն ու հարաբերությունների առավել ընդարձակմանը: Նախարար Տայանան էլ իր հերթին նշել է, որ Արգենտինան մեծապես կարեւորում է բարեկամ  Հայաստանի հետ բազմաբովանդական  համագործակցության զարգացումը, ինչի վկայությունն է Հարավային Կովկասի  տարածաշրջանում Արգենտինայի առաջին դեսպանության հիմնումը Երեւանում: Էդվարդ Նալբանդյանն ու Խորխե Տայանան քննարկել են երկկողմ օրակարգում ընդգրկված  հարցեր` նշելով, որ ձեւավորված իրավապայմանագրային դաշտն ամուր հիմք է բազմաթիվ ոլորտներում համագործակցություն ծավալելու համար: Հանդիպմանը մտքեր են փոխանակվել բարձր տեխնոլոգիաների ոլորտում փոխգործակցության խթանման, մշակութային համագործակցության ակտիվացման ուղիների, տնտեսական ճգնաժամի հետեւանքների հաղթահարման ուղղությամբ ձեռնարկվող քայլերի շուրջ: Նախարարներն արձանագրել են, որ միջազգային կազմակերպություններում Հայաստանի եւ Արգենտինայի համագործակցությունը  եւս բավական արդյունավետ է եւ հիմնված փոխադարձ աջակցության վրա: Զրուցակիցներն անդրադարձել են նաեւ լատինաամերիկյան տարածաշրջանի խնդիրներին, Հայաստանի հարաբերություններին հարեւան երկրների հետ: Արգենտինայի արտաքին քաղաքական գերատեսչության ղեկավարն այցելել է նաեւ Ծիծեռնակաբերդ, ուր ծաղկեպսակ դրել Մեծ Եղեռնի զոհերի հուշարձանին: