Երեկ երեկոյան` ժամը 21.30-ին, ոստիկանության քրեական հետախուզության գլխավոր, Երևան քաղաքի վարչությունների և մետրոպոլիտենի պահպանության բաժնի ծառայողները գողություն կատարելու կասկածանքով «Բարեկամություն» կայարանից բերման են ենթարկել Վրաստանի քաղաքացիներ, Ռուսթավի քաղաքի բնակիչներ, 1980 թ. ծնված Լաշա Ռևիային, 1990 թ. ծնված Միխայիլ Իրեմաշվիլուն, 1986 թ. ծնված Գևորգ Չաչավային և Սամտրեդիա քաղաքի բնակիչ, 1989 թ. ծնված Շալվա Խաճաուային: Ձեռնարկված օպերատիվ-հետախուզական և քննչական միջոցառումների արդյունքում պարզվել է, որ նրանք մայիսի 17-ին հարմարեցված բանալիով մուտքի դուռը բացելով` Օրբելի եղբայրների փողոցի շենքերից մեկի մի բնակարանից գողացել են ոսկյա և արծաթյա զարդեր: Լաշա Ռևիան, Միխայիլ Իրեմաշվիլին, Գևորգ Չաչավան և Շալվա Խաճաուան ձերբակալված են: Կատարվում է նախաքննություն: Այս մասին տեղեկացնում է ոստիկանության մամլո ծառայությունը: