Տեսանյութեր
Լուսանկարներ
«Ուժեղ եղիր տղա ջան, գնում ես տղամարդ դառնալու»
Լոռու մարզի Թումանյանի զինկոմիսարիատի բակն այսօր արտակարգ մարդաշատ էր: Ալավերդի քաղաքի և Թումանյանի տարածաշրջանի համայնքերի 14 զինակոչիկներ մեկնում էին Ազգային բանակ` հայրենիքի նկատմամբ իրենց պարտքը կատարելու: Զինակոչիկ Դավիթ Վարդանյանը հրաժեշտից առաջ «Հետք»-ին ասաց, որ լավ տրամադրությամբ է մեկնում ծառայության:
«Իհարկե դժվար է հարազատներիցս միանգամից հեռանալ, բայց ինչ արած պետք է հայրենիքի նկատմամբ մեր պարտքը կատարենք: Ես մեկնում եմ հայրենիքիս ծառայելու»: Իսկ զինակոչիկ Կարեն Դավթյանն անտրամադիր էր, թեև հավաստիացնում էր, որ բարձր տրամադրությամբ էր մեկնում ծառայության: «Չէ դժվար չէ մեկնելը, ուղղակի արևն է գլխիս տվել»,- վատ տրամադրության պատճառը բացատրեց զինակոչիկը:
Հավանաբար թոռնիկի վատ տրամադրությունը ցրելու համար էլ նրա պապն ու տատը հրաժեշտից առաջ խնդրեցին «Հետք»-ին թոռնիկին լուսանկարել իրենց հետ: Հուզիչ էր հայր և որդի Եզեկ և Ժիրայր Աղվանյանների հրաժեշտը:
Ծնողներից երբևէ չհեռացած տղան հորը հրաժեշտ տալիս համարյա ուզում էր արտասվել: Եզեկ Աղվանյանը որդուն գոտեպնդեց. «Ուժեղ եղիր տղա ջան, գնում ես տղամարդ դառնալու»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել