Հարցազրույց «Ազգային խորհուրդ» կուսակցության  կողմից համամասնական ընտրակարգով առաջադրված պատգամավորության թեկնածու, «Ակունք» միության նախագահ Մելս Թորոսյանի հետ Ինչպե՞ս եղավ, որ դուք առաջադրվեցիք «Ազգային խորհուրդ»-ի կողմից որպես պատգամավորության թեկնածու: Ընտրությունների վերաբերյալ որոշումը  եղել է մեր  թիմի մեծ մասի հակառակ մտածողությունը: Նախկինում մենք միշտ մտածում էինք ընտրություններին չմասնակցել, որպեսզի հնարավորություն տանք այլ ուժերին, տեսնենք թե ինչպես են ժողովրդի հետ վարվում: Առանձնապես խոսքը վերաբերում է Ազգային փոքրամասնությունների հարցին: Անցած 20 տարիների ընթացքում ամեն ինչ պարզ դարձավ: Եվ մենք որոշեցինք մասնակցել այս ընտրություններին, որպեսզի ժողովրդի մեջ ոգին չմեռնի, որպեսզի ապացուցենք, որ մենք պատկանում ենք այն ազգին, որն իրավունք ունի վրաց ազգի հետ միասին մասնակցելու պետության կառուցմանը: Ուզում ենք լիարժեք քաղաքացու իրավունք ստեղծել: Ի՞նչպես և որտե՞ղ եք անցկացնում ձեր նախընտրական  քարոզարշավը: Մեր քարոզարշավն ամենուր անցկացնում ենք. փողոցներում` գյուղերում, թե քաղաքում: Մեզ ոչ ոք շենք չի տրամադրում: Մենք թե' գրավոր եւ թե' բանավոր դիմել ենք և ստացել բացասական պատասխան: Օրինակ` գյուղերում բոլոր ակումբների կամ հասարակական շենքերի օգտագործման համար դիմել ենք, պատասխանել են, որ այն մարդն, ում մոտ որ բանալին է` տեղում չէ, կամ էլ քաղաք է գնացել: Ճիշտն ասած` շատ էլ չենք ձգտել այդ տեղերում անցկացնել մեր քարոզարշավը: Դրսում ավելի ազատ է, ժողովուրդը կտեսնի` ո՞վ է խոսողը, ինչո՞ւ  է խոսում և ի՞նչ է խոսում: Ախալքալաքում մեր փակցրած ցուցապաստառներն  անմիջապես ոչնչացնում են. նույնիսկ մեր գրասենյակի դռանը փակցրած պաստառները: Այս ամենը կատարվում է բոլոր տեղերում հատուկ մեքենաներով և մենք ունենք ֆիքսած  այդ մեքենաների համարները: Այսինքն` իրենք, այնպիսի գործողություններ են ձեռնարկում, որպեսզի մենք չդիմենք չթույլատրված գործողությունների: Այս պահին մենք այս ամենի վերաբերյալ ոչ մի արտակարգ միջոցների չենք դիմում: Իսկ նրանք անթույլատրելի տեղերում ցուցապաստառներ են փակցնում, օրինակ, ընտրատեղամասերում, ինչն անթույլատրելի է: Ի՞նչ  խոչընդոտների եք հանդիպել նախընտրական քարոզարշավի ընթացքում: Քանի որ  մեր պաստառները վրացերեն լեզվով են, ժողովուրդը մեզ խնդրեց ներկայացնել նույնը հայերենով: Դրա համար մենք հասարակ թղթի վրա տպեցինք նույնը` հայերեն: Սակայն մեզ թույլ չտվեցին այն բաժանել` բացատրելով, թե իբր տպարանում չի տպված, տպարանի անունը չկա, տպաքանակը չկա,  հասցեն չկա և այլն: Այս մասին մեզ ասել է շրջանային ընտրահանձնաժողովի նախագահը: Այսինքն` բոլոր արգելքները դրվում են մեր առաջ որպեսզի  մենք ժողովրդի հետ շփում չունենանք: Այսօր այն ֆինանսները, որն, ըստ բյուջեի, հատկացրած է սպորտային մրցումների համար, օգտագործվում են նախընտրական քարոզարշավի  ժամանակ: Շրջանային վարչության 5 պետական մեքենա է օգտագործվում նախընտրական քարոզարշավում: «Ազգային խորհուրդ» բլոկի  քարոզարշավը լուսաբանվո՞ւմ  է հեռուստատեսությամբ և ի՞նչպես: Մի  քանի օր առաջ նամակով դիմել էինք Ախալքալաքի ԱՏՎ-ին և Նինոծմինդայի «Փարվանա» հեռուստատեսությանը:Արդեն հանձնել ենք այդ նամակը, բայց դեռեւս թույլատվություն չենք ստացել: Մենք երկու անգամ հանդիպել ենք ԵԱՀԿ-ի ներկայացուցիչների հետ , եւ մեր կողմից ներկայացվել են բոլոր այն խնդիրներն ու հարցերը, որոնք առկա են նախընտրական քարոզարշավի ընթացքում: