Արամ Մաթևոսյան Ջահելությունը «տաքանում» ու պատրաստվում է Եվրոտեսիլին, իսկ ես էկզիստենցիալիզմ եմ լուսաբանում, անհամ անհամ… - Շատ են օգտագործում «էկզիստենցիալիզմ» բառը, վերջերս:- Փորձում են հասկանալ: Ընտրել են մի ճանապարհ, որը բացահայտման չի տանում: - Հասկանալու փորձը ավելի շուտ կփակի էկզիստենցիա կոչվածին, – ասացի ու մտածեցի ինքս իմ մեջ: Այ քեզ հայդեգերություն, այ քեզ տափակ դասականություն: Անուններ են ուզում, անուններ եմ տալիս, ինչ անեմ, չօգնող ու ոչինչ չասող անուններ: Հայդեգեր, Յասպերս… - Կամյու: - Կամյու: - Կամյու: Թվում է թե բոլորը գիտեն: Թվում է դա թվացվողներին: Ինչ շատ են հետաքրքրվողները: - Գաբրիել Մարսել, – ասում եմ, փորձելով դուրս գալ տրորված արահետից: Գաբրիել անունը տալիս եմ, որ զրուցակիցս չշփոթի փիլիսոփայության ուղղության հիմնադրածին երաժիշտի հետ` Ջիվանի անվան հետ կապվող Պիտեր Գաբրիել երաժիշտի: Ջիվանի մասին են մտածում մտքի պոչով էկզիստենցիալիզմ խոսքն ասած ու կրակն ընկած սեղանակիցներս … Եվրոտեսիլ: Ես հասկանում եմ նրանց անհանգստությունը, նրանց սպասման վիճակի մեջ մտնում եմ: Ես էլ սպասում նրանց հետ, օղեբաժակի զնգոցով հիշեցնելով երգի մրցույթի կազմակերպիչներին առանց այն էլ դանդաղ ընթացող ժամանակի մասին: Չի օգնում զնգոցն էլ: Զնգ – զրնգ, զնգ – զրնգ: Օղեբաժակներից դուրս եկող աղեկտուր երգը արձագանքում է դիպչելով լեռնապարին: Զնգ – զրնգ… * * * Զնգ – զրնգ: Լճի հայելում առավոտյան հարդարն է տեսնում Գեղամա լեռների Տիրուհին: Սև մազերը սփռած մերկ ուսերին, կապույտ սավանին պառկած, տաք ազդրերը դարչնագույն, շրթունքն ալ կարմիր… Ու նորից քարավանի պես միալար ձգվող խոսք. - Զուգագուլպաներ էժան, երկու հինգերորդ ռիթմ ու անուսուց պար: - Ի՞նչ, Գերմանիա՞: - Չէ, ծիրանի կորիզ: - Դուդուկ, ծիրանի կորիզ ու բոյ – բուսաթ: Հա: - Բա ինչ էիք ուզում… Սեսիլ Թեյլո°ր, Էրիկ Դոլֆի°: - Լռություն, լռություն եմ ուզում ու ծփանք … - Չէ, ոչ… այնկողմնային, ոչ: - Հունաստան: - Ռուսաստան: - Իսրայել: - Վրաստանի մասին ի°նչ կասեք: - Քաղաքականություն է: Երաժշտությունից հեռու սառը հաշվարկ: - Մեռել է Եվրոպան: Ճահիճ է անշարժ: - Պարզունակ երգեր, պրիմիտիվիզմ: - Բա ի՞նչ էիք սպասում: - Հաղթանակ: - Լավ տեղ գոնե: - Առնվազն… - Իսպանիա: - Իսպանիա՞: - Այդ մեկը չէի սպասում: Քեզանից չէի սպասում: Ինձանից չէին սպասում: Եթե սպասելիք կա, ուրեմն ծեր չեմ ես… Ուրախանում եմ ես` լեռներով, ջրի պարզությամբ, մակարդակի բարձրացմամբ, մերկությամբ կանացի: - Սե'ր: - Սեր: - Լավ բան է կյանքը, գրողը տանի: - Ջահելությունը լավ բան է: - Իմաստուն ջահելությունը: - Ջիվանը: - Ռիվասը: - Հաղթանակը: - Անընդհատ շարունակվող: Կորիզը հողի մեջ: Ծիրանի ծառը երկնքում: - Ինչու° երկնքում, պարի մեջ: - Սերը երկնքում: - Algo pequeñito, algo chiquitito - Նուրբ ժեստ: - Մի հայացք: - Գրկախառնություն: - Ծաղիկն ափի մեջ, - Ափի մեջ ափի: - Փոքրիկ ինչ որ բան: - Շատ փոքրիկ մի բան: - Սիրո պես գաղտնի: - Algo pequeñito: - Algo chiquitito: 31 մայիսի 2010 թ.