«Մաման ասեց, գնում ենք համերգ, ես ել եկել եմ»,-ասաց 6 տարեկան Անին: Նա չգիտեր, որ այսօր իր տոնն է, բայց եկել էր երեխաների պաշտպանության միջազգային օրվա առթիվ Էջմիածնում կազմակերպված տոնական համերգին: Երեխաները փուչիկներով շրջում էին փողոցներում` առանց իմանալու, թե ինչի համար է տոնակատարությունը: Տոնը յուրովի էր նշում 10- ամյա Էդգարը: Նա, ի տարբերություն նախորդ փոքրիկի, գիտեր, որ այսօր «երեխանների տոնն է» եւ փորձել էր տարբերվել մյուսներից: Նա լողավազանում լողանում էր եւ ուրախանում, թեեւ ջուրն այնքան էլ մաքուր չէր: Էդգարն ասաց, որ քիչ անց իրեն կմիանա նաեւ եղբայրը: Տղայից հետաքրքրվեցինք, թե ինչու չի գնում համերգ կամ այլ ձեւով չի նշում իր օրը, պատասխանեց. «Ուզում էին գնայի, բայց առավոտը պապան ասեց, որ փող չունենք: Ինձ ասեց, որ մի քանի օրից փող կստանա ու ինձ կտանի Երեւան»: Էդգարը չհիշեց, հայրիկի աշխատավայրը: Էջմիածնի քաղաքապետարանի դիմացի խաղահրապարակում էին հավաքվել հատկապես գյուղերից եկած երեխաները: Նրանց համար էլ էր տոն, եւ նույնիսկ երեխաների ծնողներն էին խաղի մեջ մտել: Այստեղ երեխաները կարող են անվճար խաղալ, իսկ քաղաքաբնակների երեխաներն օգտվում էին վճարովի կառուսելներից: Երեխաները նույնիսկ դրա համար էին ուրախ, որ իրենց գյուղից բերել են քաղաքի խաղահրապարակ: