Սեպտեմբերի 11-ին` ժամը 13:50-ի սահմաններում, ոստիկանության Մարտունու բաժին ահազանգ է տվել Մարտունու բուժկենտրոնի Շտապօգնության բաժանմունքի բուժքույր, 43-ամյա Գոհար Եսայանը եւ հայտնել, որ նույն օրը ստացված կանչի համաձայն` բուժօգնություն ցուցաբերելու նպատակով մեկնել է Լիճք գյուղ: Կանչը տվել էր Սահակ Հակոբի Սիմոնյանը:

Բուժքույրը ոստիկաններին հայտնել է է, որ ժամը 12:45-ի սահմաններում Սիմոնյանենց բնակարանում իրեն հարվածել եւ որովայնի շրջանում մարմնական վնասվածք է պատճառել Երեւանի Մոլդովական 25/1 շենքի բնակիչ, ՀՀ զինվորական կենտրոնական դատախազության պատիժների եւ հարկադրանքի, այլ միջոցների կիրառման օրինականության հսկողության իրականացնող բաժնի դատախազ, 39-ամյա Հակոբ Սահակի Հակոբյանը:

ֆոտոլրագրող Գագիկ Շամշյանի հետ զրույցում բուժքույր Գոհար Եսայանը պատմել է հետեւյալը. «Կանչը ստացել ենք ու բժիշկ Հրաչյա Խաչատրյանի հետ «ՈւԱԶ»-իկով գնացել ենք Լիճք գյուղ: Հիվանդը նևրոզով մի կին էր: Տանը գտնվող մի կին, որի անունը Անգին էր, ասեց, որ ինքը բուժքույր է: Ներարկման ժամանակ ինձ հարցրեց, թե ինչ եմ ներարկում, ես էլ ասեցի, որ էդ հարցով դիմեք բժշկին, քանի որ մեզ ցուցված չի հիվանդի ներկայությամբ մանրամասնել, թե ինչ ենք ներարկում:

Անգինը սկսեց բղավել վրաս եւ վիճաբանել ինձ հետ: Այդ աղմուկին ներս մտավ բժիշկը եւ նրա հետ մի տղամարդ, ով սկսեց ամենավերջին հայհոյանքները տալ իմ հասցեին եւ ապտակեց ինձ: Բժիշկը կանխեց նրա հետագա հարձակումն իմ վրա, սակայն այդ ընթացքում նա հասցրեց ոտքով հարվածել որովայնիս, որից հետո բժիշկը բարկացած նրան դուրս հրավիրեց:

Իսկ Անգինն սկսեց ինձ մեղադրել, թե «դուք հիվանդ մեռցնող եք, մի քանի օր առաջ էլ եկաք մեկի տուն, մեռել տարան»»:

Բուժքույրն ասել է նաեւ, որ այդ դեպքը եղել է մեկ շաբաթ առաջ, եւ բրիգադը մահացածի տուն հասել է վերջինիս մահից 15 րոպե հետո:

«Բուժական միջամտություններն ավարտելուց հետո դուրս եմ եկել ու կատարվածի մասին պատմել մեր վարորդին` Հանիբալ Ենոքյանին: Արդեն դրսում էդ տղամարդը նորից բռունցքներով հարձակվեց իմ վրա, հետո էլի մեր բժիշկը միջամտեց, ու մենք վազելով նստեցինք մեր «ՈՒԱԶ»-իկը»,-պատմել է Գոհար Եսայանը:

Վարորդ Հանիբալ Ենոքյանը ֆոտոլրագրողին ասել է. «40 տարուց ավելի շտապօգնության ավտո եմ քշում, էղել ա, որ հիվանդների հետ խոսք ու զրույցներ են եղել, բայց չեմ տեսել, որ օգնություն ցուցաբերող բժշկուհուն ծեծեն: Բայց մեկ ա, մենք նույն օրը ճշտեցինք, ասեցին, որ էդ մարդը մեծամեծների հետ նստում վեր ա կենում, ոչ մի բան էլ չեք կարա անեք, ընենց որ ձեններդ կտրեք, տեղներդ նստեք»:

Լիճքում Շամշյանին պատմել են, որ մի տարի առաջ էլ է դատախազ Հակոբ Հակոբյանն ինչ-որ պատմությունների մեջ ընկել, բայց էլի «ջրից չոր ա դուրս եկել»:

Լուսանկարները՝ Գագիկ Շամշյանի