ՀՀ փոխվարչապետ, տարածքային կառավարման նախարար Արմեն Գեւորգյանն այսօր մասնակցեց Հայաստանում ծննդյան գրանցում չունեցող երեխաների հայտնաբերման եւ ուղղորդման ծրագրի արդյունքների ներկայացման նպատակով կազմակերպված միջոցառմանը: Ծրագիրն իրականացվել է ՄԱԿ-ի մանկական հիմնադրամի, ՄԱԿ-ի փախստականների հարցերով գերագույն հանձնակատարի հայաստանյան գրասենյակի եւ Հայ օգնության միության միջեւ կնքված պայմանագրի համաձայն` 2009թ. սեպտեմբերից դեկտեմբերն ընկած ժամանակահատվածում, որի շրջանակում ՀՕՄ-ը կատարել է սոցիոլոգիական հետազոտություն` ծննդի պետական գրանցում չստացած երեխաների թվի, հիմնախնդրի պատճառների բացահայտման նպատակով: Ծրագրի իրականացմանն աջակցել են ՀՀ տարածքային կառավարման, աշխատանքի եւ սոցիալական հարցերի, արդարադատության, առողջապահության նախարարությունները, ինչպես նաեւ ոստիկանության անձնագրային եւ վիզաների վարչությունը: Անցկացված սոցիոլոգիական հետազոտության արդյունքներով` Երեւանի, Գեղարքունիքի եւ Շիրակի մարզերում ուսումնասիրված  1330 տնային տնտեսությունում հայտնաբերվել է  ծննդի պետական գրանցում չստացած  126 երեխա: ՀՀ մանկական խնամակալական հաստատություններում ծննդի պետական գրանցում չի ունեցել 19 երեխա: Երեխաներից 35-ը ծնվել է տնային պայմաններում: Ներկայացված են  բոլոր այն պատճառները, որոնք խոչընդոտել են երեխայի ծննդի գրանցմանը: Հատկապես մարզերում արձանագրվել են դեպքեր, երբ տնային ծնունդներից հետո ծնողները  տեղյակ չեն եղել երեխայի  ծնունդը գրանցելու անհրաժեշտության եւ ընթացակարգերի մասին: Հետազոտության հեղինակները գտնում են, որ ծնողների իրավագիտակցության մակարդակը բարձրացնելու համար մեծ դեր կարող է ունենալ մարզային հեռուստառադիոընկերություններով իրազեկման հաղորդումների հեռարձակումը: ՀՀ փոխվարչապետ, տարածքային կառավարման նախարար Արմեն Գեւորգյանը նշեց, որ հանրապետությունում երեխայի ծննդի պետական գրանցման հետ կապված խնդիրները, առկա օրենսդրական բացթողումներն ուսումնասիրելու նպատակով արդեն ստեղծված է միջգերատեսչական աշխատանքային խումբ, որը պետք է ներկայացնի առաջարկություններ` խնդրի համալիր լուծման մեխանիզմների վերաբերյալ: Փոխվարչապետը նշեց, որ պետական եւ հասարակական հատվածի համագործակցությամբ պետք է ակտիվ աշխատանքներ տարվեն այս երեւույթը վերացնելու ուղղությամբ, քանի որ նման երեխաները խոցելի են նաեւ բռնության, շահագործման, թրաֆիքինգի  ենթարկվելու առումով: Այս մասին տեղեկացնում է հասարակայնության հետ կապերի բաժինը: