«Հնեվանքում եւ Կոբայրավանքում վերականգնողական աշխատանքները շարունակվում են»
Վերահսկիչ պալատը նախորդ տարի Մշակույթի նախարարության 2007-2008թթ-ին պետական բյուջեից ստացված միջոցների օգտագործման վերաբերյալ արձանագրել էր ընդհանուր առմամբ` 61 մլն 499 հազար դրամ որպես ֆինանսական խախտումներ, որից 118.5 մլն դրամը` հուշարձանների վերականգնման ծրագրի շրջանակներում:
Մշակույթի նախարարության պատմության եւ մշակույթի հուշարձանների պահպանության գործակալության պետի տեղակալ Սամվել Մոսոյանը «Հետքի» հետ զրույցում նշեց, որ Վերահսկիչ պալատը շտապել էր իր գնահատականներում:
«Հարցը նրանում չէր, որ հուշարձանները չէին վերանորոգվել, այլ գումարի որոշ մասը նպատակային չի ծախսվել: Հնավանքում եւ Կոբայրավանքում է այս խնդիրը եղել, բայց հետագայում պարզվեց, որ հումք է ձեռք բերվել, բայց չի հաշվառվել, արվել է որոշ աշխատանքներ, որոնք կատարողականով չի ձեւակերպվել: Արդյունքում` գումարը ծախսվել էր, բայց նրանց մոտ չկար փաստաթուղթ»,- ասաց Սամվել Մոսոյանը:
«Վերահսկիչ պալատը որ ներկայացրեց, թե Հնեվանքն ամբողջությամբ փչացրել են, տարբեր գույների քարեր են օգտագործել, մասնագիտական խնդիր էր, նույն հանքից հանված քարեր էին, բայց դրանց գույնն անընդհատ փոխվում է անձրեւից, արեւից, նույն քարերը տարբեր գույներ են ստանում: Հետագայում մասնագետները գրեցին, որ դրանք նույն քարերն են, ժամանակի ընթացքում դրանք բոլորը կդառնան նույն գույնը»,- վստահեցնում է Սամվել Մոսոյանը:
Նրա խոսքով` 2007-ից սկսած հուշարձանների վերականգման աշխատանքները վերահսկում է ոչ թե Պատմության եւ մշակույթի հուշարձանների պահպանության գործակալությունը, այլ նախարարության համապատասխան հանձնաժողովը:
Սամվել Մոսոյանը նշեց, որ Հնավանքում եւ Կոբայրավանքում վերականգնողական աշխատանքները շարունակվում են. «Գործընթացը որոշ ժամանակ կանգնել է, բայց դրանք շարունավում են»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել