Մոտ մեկ ժամ առաջ ավարտվեց «Սարդարապատ» քաղաքացիական նախաձեռնության այլընտրանքային «Ազգային Ժողովի» սոցիալ-տնտեսական հանձնաժողովի անդրանիկ նիստը, որի ընթացքում ճշտվեցին առաջիկա ծրագրերն ու աշխատանքները: Նիստը համակարգող Ժիրայր Սեֆիլյանը նշեց հանձնաժողովի նպատակները: Դրանցից առաջինը ազատ բեմահարթակ ստեղծելն է, որտեղ կհնչեցվեն եւ կքննարկվեն բոլորի կարծիքները:

Աշխատանքներում պետք է ներգրավվեն երիտասարդ մասնագետներ. «Որովհետեւ առանց ոլորտի երիտասարդացման` չենք պատկերացնում փոփոխություներ»,- նշեց Սեֆիլյանը: Այլընտրանքային «Ազգային ժողովի» «պատգամավորները» պետք է նաեւ լուծեն ժողովրդի անունից լիազորվելու խնդիրը, որպեսզի իրենց ներկայացրած փաստաթղթերը իրավական հիմք ունենան:

Սոցիալ-տնտեսական հանձնաժողովի անդամ Հայկ Բալանյանը նշեց առկա 3 խնդիր, որոնց հաղթահարումն էլ հանձնաժողովի նպատակներից է:

1. Դեինդուստրացիա. արդյունաբերության կորուստը սովետական կարգերի փլուզումից հետո

2. Դեսոցիալիզացիա: Ըստ Հայկ  Բալանյանի` դեինդուստրացիան հանգեցրել է դեսոցիալիզացիայի, երբ միջին խավ ձեւավորված չէ:

3. Դեպոպուլիզացիա: Հայրենիքից դժգոհ բազմաթիվ քաղաքացիներ, որոնց մեջ մեծ թիվ են կազմում գիտնականները, մտավորականներն ու ստեղծագործող մարդիկ, վերջին տարիներին լքել են հայրենիքը:

Հայկ Բալանյանը մեր հասարակությունը անվանեց «թլպատված», քանի որ որակյալ մասնագետների մեծամասնությունը Հայաստանում չէ այժմ: Բանախոսը նշեց, որ իրենց հանձնաժողովը բաց է լինելու կարծիքների եւ քննադատության համար. «Այդպես մենք էլ կփոխվենք, հասարակությունը պետք է բարեփոխվի, այլապես մենք չենք կարող բարեփոխումներ կատարել»:

Հանձնաժողովը նպատակադրվել է ծրագիր կազմելուց հետո այն ներկայացնել հանրությանն ու արժանացնել ժողովրդի հավանությանը, քանի որ վստահ է, որ միայն սոցիալական պահանջի դեպքում ծրագիրն իրականություն կդառնա:

Հայկ Բալանյանը «Հետքի» հետ զրույցում ասաց, որ ծրագրի հաստատումից հետո իրենք կայցելեն մարզեր եւ մարդկանց կներկայացնեն այն: «Մենք ունենք ռազմավարական ծրագիր, որը չենք ցանկանում հրապարակել»,- ասաց Բալանյանը:

«Պատգամավոր» Ալեք Ենիգոմշույանն իր խոսքում նշեց, որ պետք է իդեալ ունենան, որին հասնելուն էլ ուղղված կլինեն իրենց բոլոր քայլերը: Այդ իդեալը այնպիսի Հայաստան ունենալն է, որտեղ յուրաքանչյուր քաղաքացի կկարողանա իրացնել ինքն իրեն: «Կացությունը գնալով օրհասական է դառնում: Եթե այսպես շարունակվի, մի 30 տարի անց մենք կկորցնենք մեր պետությունը, հայրենիքն ու ժողովուրդը»,- կարծում է Ենիգոմշույանը:

«Ժառանգություն» կուսակցությունից վերջերս դուրս եկած Մովսես Արիստակեսյանը մտահոգված էր, որ մասնագետների ռեսուրսները մասնատվում են, եւ աշխատանքն անարդյունավետ է դառնում: Ի պատասխան` Ժիրայր Սեֆիլյանն ասաց, որ իրենք պետք է համախմբեն բոլորին, քանի որ մասնագետները բաժանված են 3 մասի` իշխանություն, Հայ ազգային կոնգրես եւ նրանք, ովքեր չեն համակրում ոչ իշխանությանը, ոչ ՀԱԿ-ին:

Տնտեսական հանձնաժողովի անդրանիկ նիստի համակարգողը նշեց, որ իրենց անհրաժեշտ են ֆինանսական ռեսուրսներ, որոնք, սակայն, չպետք է ստացվեն միջազգային կազմակերպություններից: «Սփյուռքում կան անհատներ, որոնք պատրաստ են մեզ օժանդակել ֆինանսապես, եւ այդ հոսքը կլինի», - ասաց Ժիրայր Սեֆիլյանը:

Ռեժիսոր Տիգրան Խզմալյանն էլ նշեց, որ Հայաստանին իշխաններ պետք չեն, այլ ծառաներ են պետք, որոնք հրավիրվում են աշխատելու:

Նշենք, որ «Ազգային ժողովի» սոցիալ-տնտեսական հանձնաժողովի առաջին նիստը տեղի ունեցավ Մարդու իրավունքների եւ ժողովրդավարության ինստիտուտի գրասենյակում: