Տեսանյութեր
Լուսանկարներ
Վարչապետը «ճտերն աշնանն է հաշվելու»
ԼՂՀ վարչապետ Ա.Հարությունյանի մոտ այսօր տեղի է ունեցել խորհրդակցություն գյուղատնտեսական հարցերով: Կառավարությանն առընթեր փրկարար ծառայության տնօրեն Արթուր Հարությունյանը տեղեկատվություն հաղորդեց Մարտակերտի շրջանի դաշտերում մորեխների տարածվածության մասին: Այդ առթիվ վարչապետը որոշակի հանձնարարականներ տվեց` իրավիճակը վերահսկելու և անհրաժեշտ միջոցներ իրականացնելու ուղղությամբ:
Հացահատիկայինների սկսված բերքահավաքի առաջին տվյալները հրապարակեց գյուղնախարար Ա.Ծատրյանը: Նրա խոսքով` հեկտարի միջին բերքատվությունը կազմում է 16,5 ցենտներ: Վարչապետը հանձնարարեց ապահովել բերքահավաքի բարձր տեմպեր և խստիվ իրականացնել հակահրդեհային միջոցառումներ:
Խորհրդակցությունում լուրջ մտահոգություն հայտնվեց արտերի` մոլախոտերով վարակվածության առթիվ: Վարչապետ Ա.Հարությունյանը արտահայտելով իր խիստ դժգոհությունը ժամանակին անհրաժեշտ պայքար չտանելու համար, հայտարարել է, որ պատասխանատու անձանց հարցը կքննարկվի բերքահավքից հետո:
Կառավարության ղեկավարը նշել է, որ այսօրվանից իսկ պետք է պատրաստ լինել աշնանացանին` հստակ հետևելով հացահատիկային կուլտուրաների մշակության կանոններին: Գյուղատնտեսության պատասխանատուներից և շրջվարչակազմերի ղեկավարներից պահանջվեց կանոնավորապես տեղեկություններ տալ ընթացիկ աշխատանքների մասին: Այս մասին տեղեկացնում է ԼՂՀ կառավարության տեղեկատվության և հասարակայնության հետ կապերի վարչությունը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել