«Օրենքով գող» Գագիկ Էլոյանի տվյալները դեռեւս ճտվում են Իսպանիայում մաֆիայի դեմ իրականացրած գործողություններում ձերբակալվել են մի խումբ նախկին ԽՍՀՄ երկրների քաղաքացիներ, որոնց մեջ, «Հետքի» տեղեկություններով, կան նաև հայազգիներ, այդ թվում` «օրենքով գողի» համարում ունեցող Գագիկ Էլոյանը (տես նկարը): ԱԳՆ մամուլի, տեղեկատվության և հասարակայնության հետ կապ վարչության պետ Տիգրան Բալայանը «Հետքին» հայտնեց, որ, իրոք, ձերբակալվածներից 4-ը հայեր են, սակայն առայժմ հայտի չէ` նրանցից քանի՞սն են ՀՀ քաղաքացիներ: «Առայժմ մեզ հաջողվել է պարզել միայն այն, որ նրանցից երկուսը ՀՀ քաղաքացիներ չեն, հավանաբար, Ղազախստանի քաղաքացիներ են: Բայց այս տեղեկությունը դեռեւս ճշտված չէ»,- ասաց Տ. Բալայանը: Մյուս երկու անձանց, այդ թվում` Գագիկ Էլոյանի քաղաքացիությունը դեռեւս ճշտված չէ: Տիգրան բալայանը վստահեցրեց, որ Իսպանիայում Հայաստանի հյուպատոսության միջոցով արտգործնախարարությունը ճշտում է մանրամասները, որոնք կհրապարակեն` հայտնի լինելուն պես: Հիշեցնենք, որ Իսպանիայի իրավապահները հունիսի 16-ի երեկոյան ձերբակալել էին 6 մարդու, որոնց նրանք համարում են ռուսական մաֆիայի պարագլուխներ: Բոլոր ձերբակալվածներն էլ կասկածվում են փողերի լվացման, խարդախության եւ կազմակերպված հանցավոր խումբ ստեղծելու մեջ: Ռուսական լրատվամիջոցները, հղում անելով տեղի ոստիկանությանը, նշել են, որ ձերբակալվածները հինգ երկրների քաղաքացիներ են` Ռուսաստան, Ուկրաինա, Հայաստան, Ղազախստան եւ Ուզբեկստան: Նրանք ունեն «օրենքով գողի» համարում եւ մաֆիային ապահովում են դրամական միջոցներով: Գումարները, ըստ ոստիկանության, հանցագործները ներդրել են հյուրանոցային եւ ռեստորանային բիզնեսում: Նրանցից մեկը ձերբակալվել է Բարսելոնայի օդանավակայանում, որտեղ նա փորձել է միջանկյալ վայրէջք կատարել: Այս տղամարդը, որը, ըստ երեւույթին, մաֆիայի պարագլուխն է, ինքնաթիռը նստել է Դուբայում եւ փորձել Բարսելոնայով հասնել Ամստերդամ: Կատալոնիայի իրավապահները միաժամանակ խուզարկություններ են սկսել կասկածյալների բնակարաններում եւ նրանց հետ կապված ընկերություններում: Ոստիկանությունն արգելանքի է վերցրել կասկածյալներին պատկանող 30 ավտոմեքենաները: Օպերացիայի շրջանակներում արգելանքի տակ է դրվել նաեւ 500 բանկային հաշիվներ: Ոտիկանությունը պաշտոնապես հաստատել է 6 անձի ձերբակալելու մասին տեղեկությունը, սակայն հրաժարվել է մեկնաբանել` արդյոք վերջիններս կապվա՞ծ են ռուսական մաֆիայի հետ, թե՞ ոչ: Իսպանիայում ՌԴ դեսպանության ներկայացուցիչը, ինչպես հայտնում է «Газета.Ru»-ն, հրաժարվել է կատարվածի մասին մեկնաբարություններ տալ` պատճառաբանելով, որ իսպանական կողմը դիվանագիտական ճանապարհով առայժմ պաշտոնապես չի հայտնել ՌԴ քաղաքացիների ձերբակալելու մասին: Իսկ մինչ այդ իսպանական ԶԼՄ-ները հայտնում էին, որ «Տամբովյան հանցավոր խմբավորման» 20 անդամների ձերբակալման մասին, որոնցից մեկը հանցավոր խմբավորման պարագլուխ Վիտալի Իզգիլովն է, որը ձերբակալվել էր Բալեարյան կղզիներիներում: Իսպանիայի լրատվամիջոցները միաժամանակ հայտնում են, որ ձերբակալման օպերացիան կապված է միջազգային հատուկ գործողություն հետ, որն անցկացվել է այս տարվա մարտին: Այդ ժամանակ Իսպանիայում, Ավստրիայում, Իտալիայում, Գերմանիայում, Ֆրանսիայում եւ Շվեյցարիայում ձերբակալվել էր շուրջ 70 մարդ, որոնց մեջ կային Ռուսաստանի, Վրաստանի եւ Հայաստանի քաղաքացիներ: