Լեռնային Ղարաբաղի Հանրապետության Պաշտպանության բանակից ստացված տեղեկությունների համաձայն` սույն թվականի հունիսի 18-ին Ադրբեջանից ԼՂՀ տարածք է ներխուժել զինված հետախուզական խմբավորում. տեղի ունեցած դիմահար մերձամարտի հետևանքով հայկական կողմը տվել է չորս զոհ և չորս վիրավոր: Արձագանքելով պատահարին` նշում ենք. Դեռևս սույն թվականի 1-ին եռամսյակում Քաղաքական զարգացումների հետազոտական կենտրոնի (ՔԶՀԿ) կատարած հետազոտությունները ցույց էին տվել Ադրբեջանի կողմից ռազմական ագրեսիայի վերսկսման հնարավորության համար հստակ նախադրյալների առկայության փաստը: Հետազոտությունները մասնակիորեն նաև հրապարակվել են ապրիլին` «Անկախ» շաբաթաթերթում` ՔԶՀԿ նախագահի հեղինակած հոդվածում. http://ankakh.com/2010/04/30507/, որում մասնավորապես ասված է. «Պատերազմաշունչ հայտարարությունները զուգորդվել են ռազմական բյուջեի աննորմալ աճի հետ: Իսկ զինված ուժերի վերազինումն ու արդիականացումը համատեղվել է ռազմական ստուգումների փորձերով (2008թ. մարտին և նոյեմբերին, 2010թ. մարտին, հնարավոր է և` 2010 թ. ամռանը)»: - Հաստատելով ՔԶՀԿ-ի կատարած հետազոտությունների և վերլուծությունների ճշմարտացիությունը ադրբեջանաղարաբաղյան շփման գծում մարտի միջոցով ստուգումների պարբերականության և ռազմական գործողությունների վերսկսման հնարավորության վերաբերյալ, - հաշվի առնելով հունիսի 18-ին Ադրբեջանի կողմից ԼՂՀ դեմ ռազմական ագրեսիվ գործողության փաստը, - հաշվի առնելով վերջին շրջանում Ադրբեջանի կողմից ռազմական գործողությունների վերսկսկմանն առնչվող օրենսդրական որոշումների փաստերը (հունիսի 8-ին Ադրբեջանի Միլի Մեջլիսի կողմից Ադրբեջանի ռազմական դոկտրինի ընդունումը, որում նշված է Ադրբեջանի կողմից ռազմական ուժի գործադրման իրավունքի մասին, հունիսի 18-ին Ադրբեջանի Միլի Մեջլիսի կողմից Սահմանադրական դատարանի մասին օրենքում փոփոխություններ անելու վերաբերյալ օրինագծի ընդունումը, որը նախատեսում է ակտիվ ռազմական գործողություների ժամանակ երկարաձգել խորհրդարանի և նախագահի գործունեության ժամկետը՝ ընդհուպ մինչև դրանց ավարտը), տվյալ իրավիճակը գնահատում ենք որպես Լեռնային Ղարաբաղի Հանրապետության դեմ Ադրբեջանի կողմից պոտենցիալ սպառնալիքի իրական դառնալու հնարավորություն: (Ադրեջանի կողմից մարտի միջոցով ստուգումները, լինելով ստանդարտ միջոցառումների համալիր, նաև ենթադրում են հնարավոր ռազմական գործողությունների վերսկսման համար պայմանների նախապատրաստման միջոց): - Ելնելով տվյալ գնահատականից, - նաև վերը նշված փաստերը համարելով ԼՂՀ դեմ Ադրբեջանի կողմից ռազմական գործողությունների վերսկսկման համար «անհրաժեշտ, բայց ոչ բավարար» պայմաններ ու գործոններ, այնուամենայնիվ, ԼՂՀ-ի և Հայաստանի Հանրապետության (ՀՀ) կողմից հայության մարտական պատրաստվածության բարձր մակարդակի ապահովումը սահմանում ենք` որպես կենսականորեն կարևոր պայման: Կոչ ենք անում ԼՂՀ և ՀՀ բարձրագույն ղեկավարությանը ակտիվացնել հանրային քաղաքականությունը նշված ուղղությամբ: Վահան Դիլանյան, Քաղաքական զարգացումների հետազոտական կենտրոնի նախագահ 2010թ., հունիսի 20