Սիսիանի Համո Սահյանի անվան մշակույթի կենտրոնը 2010 թ. օգոստոսին իր դռները կբացի արդեն հիմնանորոգված, բարեկարգ տեսքով: Բարեկարգման աշխատանքներն այստեղ սկսվել են 2009թ. օգոստոսից` Հայաստանի սոցներդրումների հիմնադրամի ֆինանսավորմամբ եւ Սիսիանի քաղաքապետարանի 10 % ներդրմամբ: Աշխատանքների ընդհանուր ծավալը 110 մլն դրամ է: 1960-ական թթ. կառուցված մշակույթի տունը ժամանակակից տեսք ու հարմարություններ կունենա` ավելի մեծ բեմահարթակ, նոր, երկհարկանի կցակառույց` հետնամուտքով, հարդարման սենյակներով, սանհանգույցով, նախաբեմով: Առաջին հարկում առանձնացված են նիստերի սրահը, երաժշտական խմբասենյակները, խոհանոցը: Կգործի նաեւ սահյանական անկյուն: Շենքի` ճարտարապետական արժեք ունեցող ճակատային մասում, որը նախագծել է Ռաֆայել Իսրայելյանը, միայն մաքրման աշխատանքներ են իրականացվել: «Ամբողջությամբ վերանորոգվել է տանիքը` 570 ք/մ, կցակառույց է կառուցվել` 50 ք/մ` 1-ին եւ 2-րդ հարկով, հիմնանորոգվել է դահլիճը: Առաստաղն ամբողջությամբ եղել է փայտից, այժմ` երկաթբետոնից, հատակները եւս բետոնացվել են: Շենքն ամբողջությամբ ամրանավորվել, ուժեղացվել է: Ներքին հարդարման աշխատանքներից մնում է հատակը, այնուհետեւ կիրականացվեն ներկարարական աշխատանքները»,- ասում է Սիսիանի «Նորոգշին» ԲԲԸ տնօրեն Սամսոն Մաթեւոսյանը: Այս ձմռանն արդեն ջեռուցման խնդիր չեն ունենա ինչպես մշակույթի կենտրոնում, այնպես էլ կից գործող գրադարանում: Շինարարները վստահեցնում են` աշխատանքների որակին առաջնային ուշադրություն է դարձվում: Հիմնանորոգման աշխատանքները ավարտական փուլում են: Մինչեւ օգոստոս պետք է ավարտվեն նաեւ կահավորման, տեխնիկական հագեցվածության, ձայնալուսային սարքավորումների ձեռքբերման եւ մոնտաժման աշխատանքները: Դահլիճի աթոռների ձեռքբերման եւ տեղադրման աշխատանքները իրականացվելու են դարձյալ Սոցներդրումների հիմնադրամի միջոցներով, մեկ այլ ծրագրով: