Բարերար Հրայր Հովնանյանի նախաձեռնությամբ եւ հովանավորությամբ մայրաքաղաքի Խանջյան-Թումանյան փողոցների հատման մասում կառուցվում է վերգետնյա անցում հետիոտների համար: Ձեռնարկի իրականացումը վստահվել է «Հայաստան» համահայկական հիմնադրամին: Այն իրականացվում է Երեւանի քաղաքապետարանի հետ համատեղ: Հենասյուների հիմքերն արդեն փորված են, սկսվել են բետոնացման  աշխատանքները: 2,5մ լայնությամբ եւ 25մ երկարությամբ վերգետնյա անցումը կունենա լուսավորություն, ջրահեռացման համակարգ եւ սալիկապատ հատակ: «Ցավոք, այսօր մայրաքաղաքում էլ խնդիրներ շատ կան: Քաղաքի այս գերծանրաբեռնված հանգույցում վերգետնյա անցումը անհրաժեշտություն է: Այն կապահովի հետիոտնի անվտանգությունը եւ հնարավորինս կնվազեցնի անցանկալի պատահարները: Պակաս կարեւոր չէ մայրաքաղաքի բնակիչների անվտանգ ելումուտը օղակաձեւ այգի, որը հանգստյան գոտի է հանդիսանում շրջակայքի բնակիչների համար»,- նշում է «Հայաստան» համահայկական հիմնադրամի գործադիր տնօրեն Արա Վարդանյանը: Հատկանշական է, որ Հ.Հովնանյանի հովանավորությամբ Շուշիում կկառուցվի նաեւ մանկատուն: Ծրագիրը ներկայումս նախագծային փուլում է: «Հայաստան» համահայկական հիմնադրամ