«Ցավոք, մեր աշխատանքն այս տարվա գարնանը սկսվեց հորդառատ անձրևների տված վնասներով` չնայած սրանով նաև կյանքը ցույց տվեց, որ մեր միջպետական ճանապարհները որոշակի լուրջ վերանայման անհրաժեշտություն ունեն` թե վերանորոգելու, թե պահպանելու և շահագործելու առումով»,- ասաց Տրանսպորտի և կապի նախարար Մանուկ Վարդանյանը լրագրողների հետ հանդիպման ժամանակ: Այս տարի 40 վթար է գրանցվել միջպետական ճանապարհներին: Այս դաշտում խիստ հսկողություն կա թե նախագահի, թե վարչապետի կողմից: Այսօր նախագահ Սերժ Սարգսյանի հանձնարարականով, այս շաբաթվա կամ հաջորդ շաբաթվա կառավարության նիստում շուրջ 3,5 մլրդ դրամ կտրամադրվի վթարների վերացման համար: Իսկ գումարը ճիշտ ծախսելու պատասխանատվություն է ստանձնել անձամբ ինքը` Մանուկ Վարդանյանը: Անմխիթար վիճակում են հատկապես Իջևան, Մեղրի, Սիսիան, Գորիս հատվածները: Շիրակի, Լոռի մարզերում ևս վտանգավոր իրավիճակ է ստեղծվել, ինչի պատճառով ճանապարհը փակ է: Մինչև հուլիսի 3-ը նախարարի հանձնարարությամբ ճանապարհը փակ կմնա: «Տասնյակ տարիների կառուցված ճանապարհ է, դրան գումարած` մեր ճանապարհները կառուցված են 10-15 տ-անոց բեռների համար, դա Խորհրդային տարիներին կառուցված ճանապարհ է, անընդհանտ վերանորոգելու խնդիր ենք դրել, ամբողջական վերանորոգելու հարց երբեք չենք դրել` ասենք` Երևանից Իջևան կամ դեպի Ադրբեջանի սահման, կամ Լոռվա մարզից դեպի Վրաստան»,- նշեց նախարարը: Կառավարությանը ներկայացվելիք 3,5 մլրդ դրամի նախնական գնահատականով նախագիծն ավարտական փուլին կհասնի առաջիկա մեկ կամ երկու օրերին: