Հունիսի 26-29-ը ճանաչողական այցով Հայաստան ժամանած Ժնևի ամենամյա միջազգային գրքի փառատոնի կազմակերպչական տնօրեն Պիեռ Մարսել Ֆավրին և Շվեյցարիայում ճանաչված հրատարակիչ Պիեռ Լամունիերին պատրաստակամ են 2011թ. Ժնևի գրքի ամենամյա միջազգային ցուցահանդեսին Հայաստանին ընդունելու պատվավոր հյուրի կարգավիճակով: Այս մասին նրանք ասել են ՀՀ մշակույթի նախարար Հասմիկ Պողոսյանի հետ հանդիպման ժամանակ: Պիեռ Մարսել Ֆավրի հավաստմամբ` իրենք պատրաստակամ են ցուցահանդեսի օրերին հյուրընկալելու մշակույթի նախարարին և ցուցահանդեսի շրջանակներում փառատոնային ծրագրով Ժնևում հանդես եկող մշակութային պատվիրակությանը: Հյուրընկալող կողմը նախատեսում է տեղի առաջատար ԶԼՄ-ներով ներկայացնել Հայաստանի մասին պատմող բազմաբնույթ տեղեկատվություն: Կազմակերպիչների գնահատմամբ` Ժնևի հայ համայնքը շատ ակտիվ է մասնակցում և բազմակողմանիորեն ներկայացված է գրքի ամենամյա միջազգային ցուցահանդեսին: 1987 թ. հիմնադրված (salon du livre) Ժնևի գրքի ամենամյա միջազգային ցուցահանդեսը տևում է 5 օր և ունենում է շուրջ 100.000 այցելու: Այս մասին հայտնում է ՀՀ մշակույթի նախարարության հասարակայնության հետ կապերի բաժինը: