Սեպտեմբերի 21-ին, երբ համայն հայությունը Հանրապետության հրապարակում տոնում էր Հայաստանի անկախության 20-րդ տարեդարձը եւ Երեւանի տոնը, մի խումբ բնապահպան հեծանվորդներ աղբից մաքրում էին Երեւանի դեմքը՝ Բուսաբանական այգին:

Երիտասարդները աղբահանության գործին լծվել էին ինքնակամ եւ հանդիպել զարհուրելի տեսարանների: Բնապահպան ակտիվիստ Մարիամ Սուխուդյանը «Հետքի» հետ զրույցում տեղեկացրեց, որ այն, ինչ տեսել են ու հավաքել են Բուսաբանական այգում, շատ զարմացրել է իրենց:

«Այգում տիրում է անառակ, անառողջ մթնոլորտ, ամենուր ասեղներ էին, օղու ջարդած շշեր, եւ սեքսից հետո մերկ աղջկա հագուստի մնացորդներ»,-ասում է ակտիվիստը:

Երիտասարդներն այգում գտել եւ հավաքել են նաեւ կանանց տամպոններ, երեխաների տակդիրներ, կոշիկներ, տաբատներ, օղու եւ գարեջրի շշեր եւ նմանատիպ շատ իրեր: «Կուզենայինք տնօրինությունը ինչ որ չափով մեզ աջակցեր` գոնե աղբի դույլեր ավելի շատ վայրերում տեղադրելով, որ ստիպված չլինենք երկար տարածություններ անցնել աղբը թափելու համար»,-ասում է Մարիամ Սուխուդյանը:

Ըստ Մարիամի՝ իրենց կողմից այգու մաքրման աշխատանքները շարունակական են լինելու, քանի որ աղբի մեծ հանքեր են հայտնաբերել:

Լուսանկարները՝ Սիրանույշ Բաղդասարյանի