Պետբյուջեից գումարները հատկացվում են, բայց արդյունքը չի երեւում
Հանրապետությունում գարնան անձրևից ու կարկուտից այս տարի առավել տուժել են Շիրակի, Արագածոտնի, Արմավիրի ու Արարատի մարզերը: Ամեն տարի կառավարությունը պետական բյուջեից գումարներ է հատկացնում համայնքներում նոր հակակարկտային կայաններ տեղադրելու համար, սակայն կայաններ տեղադրելուց հետո էլ գյուղացին չի ապահովագրվում կարկուտից: Հակակարկտային կայանները բավականին թանկ են պետական բյուջեի համար. մեկ կայանի տեղադրումն արժե մոտ 9 միլիոն դրամ:
Հանրապետությունում հակակարկտային կայաններ տեղադրում է միայն Արտակարգ իրավիճակների նախարարության «Մթնոլորտային երեւույթների վրա ակտիվ ներգործության ծառայության» ՊՈԱԿ-ն ու «Բարվա» ՍՊԸ-ն: Վերջինս անհամեմատ ավելի մատչելի գներով է կայաններ տեղադրում` 5 մլն դրամ (առանց ԱԱՀ-ի): Քանի որ մրցակցություն կա, երկու ընկերություններն էլ ջանում են իրար սևացնելով ավելի շատ կայաններ տեղադրելու հայտեր ստանալ, ինչից գյուղացին չի օգտվում: ՊՈԱԿ-ի կայանները պատրաստում է «Պոստ Լեքս Քոնսալթինգ» ՍՊԸ-ն:
Արագածոտնի մարզում կա 15 հակակարկտային կայան` Կարբիում` 3, Օհանավանում` 3, Արտաշավանում` 1 Սաղմոսավանում` 1 Ոսկեվազում` 1, Ոսկեհատում` 1, Ագարակում` 2, Աղձքում` 1, Ղազարավանում` 1, Փարպիում` 1:
«Հետքի» հետ զրույցում մարզպետարանի գյուղատնտեսության եւ բնապահպանության վարչության պետ Յուրա Ազատյանը տեղեկացրեց, որ մարզի բոլոր կայաններն էլ շահագործվում են, սակայն ոչ բոլոր դեպքերում են լիարժեք արդյունք տալիս: «Կարբի, Օհանավան համայնքներում, օրինակ, 3-ական կայան կա, բայց կարկուտը մեծ վնասներ է տվել, քանի որ քամին շատ մեծ ուժգնության է եղել, եւ կայաններն անզոր են եղել դիմակայել այդ ուժգնությանը: Յուրաքանչյուր կայան ապահովում է 80-100 հա-ի անվտանգություն, որը մի քանի անգամ պակաս է նշված համայնքների հողատարածքից: Նույն Կարբիում կամ Օհանավանում, 3-ական կայանները չեն կարող ապահովել այդ գյուղերի խնձորի այգիները, որոնք 1000 հա -ից ավելի են կազմում»,- ասում է Յուրա Ազատյանը: Նշված համայնքներում կայանները շահագործվում են ՊՈԱԿ-ի կողմից:
Արմավիրի մարզում կա 32 հակակարկտային կայան: Ինչպես տեղեկացրեց մարզպետի օգնական Նվեր Պետրոսյանը, կայաններից 12-ը «Բարվա» ընկերության են պատկանում, որոնք տեղադրվել են «ՎիվաՍելլ»-ի միջոցներով: Մարզպետի օգնականը նշեց, որ տեղադրված կայանների տարածքներում կարկուտը վնասներ չի հասցրել:
Հայկական «Բարվա» ընկերության նախագահ Արամ Վարդանյանը ¦Հետքի§ հետ զրույցում շատ արդյունավետ գնահատեց իրենց կայանները եւ նշեց, որ արդեն արտերկրից էլ պատվերներ ունեն. «Հիմա նաեւ «Զենիթ մինի» ենք կառուցել, 25-30 հա տարածք է ծածկում, գինն էլ 1.6 միլիոն դրամ է: Դա ֆերմերային տնտեսությունների համար է, եւ նրանց համար այդ սարքը ուղղակի փրկություն է: Վերջերս ստեղծել ենք աշխարհում նմանը չունեցող հակացրտահարության սարք` անտիֆրոզը, որը մեկ գիշերվա մեջ կարող է 15 հա ծաղկած այգի պաշտպանել: Նման մեկ սարք Բելգիայից բերել էին, 25 000 դոլար էր արժեցել»:
Հայկական անտիֆրոզը մարտին փորձարկվել է եւ, ըստ Ա. Վարդանյանի, մոտ 5 անգամ արդյունավետ է եղել մինչ այդ եղած նման սարքերից: Անտիֆրոզի մեկ հատն արժենալու է 4-5 հազար դոլար:
Մինչ ընկերությունները իրար հերթ չտալով գովաբանում էին իրենց կայանները, գյուղապետերը «Հետքին» դժգոհում էին, որ հակակարկտային կայանները արդյունավետ չեն գործում եւ իրենք շարունակում են վնասներ կրել:
Հ. Գ. Հակակարկտային կայանների թեման առավել մանրամասն կարդացեք «Հետք» շաբաթաթերթի առաջիկա համարում:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել